Aizawl : Nimin zing dar li leh a chanve vel khan Vairengte Check Gate-ah Champhai lam atanga Silchar lam pan lirthei atangin Methamphetamine (wy) mum (tablet) nuai 39, polythene bag 390-a thun chu Mizoram Police-te’n an man.

Meth-te hi truck chhuatphah siam danglam chhungah phurh thlak niin kg 429 - rit a ni a, international market anga chhut chuan Cheng nuai 9750 man anga chhut a ni a, he motor khalhtu Ramnunmawia (30) s/o H.Vanlalhluna, Zokhawthar chu U/S 22 (C)/25 ND&PS act tlawh chhana man a ni.

Driver hian a sawi dan chuan Lalsiammawia, Champhai chuan a lirthei hi Silchar-ah mi pakhat hnena hlan chhawng turin a hrilh niin a sawi a, hlan chhawng tura titu hian a hlan chhawn tur hi a hrilh lem lo niin a sawi bawk a, a tirtu hian Rs. 5000/- hlawh turin a chhawr niin a mantu te hnenah hian a hrilh.