Aizawl July 8, 2023 : Vairengte College chu Serlui bialtu MLA Lalrinsanga Ralte, Vice Chairman, Rubber & Allied Crops Dev. Board ni bawk chuan Zirtawpni khan hawng a. July- December 2023 chhunga College-a thawkte hlawh tur pawh bialtu MLA in a pe nghal bawk.

Vairengte College hi kumin 2023 Academic Session atanga tan nghal niin Govt.Saitual College Principal pension ta Dr. Lalsiamhnuna Principal na hnuaiah thawktu - Teaching Faculty paruk (6) leh LDC pakhat (1) te an awm mek a. Tun kum July - December chhunga Vairengte College a thawktute hlawh tur zawng zawng hi Bialtu MLA Lalrinsanga Ralte chuan tum sak vekin Vairengte College bultanna atan hian bialtu MLA chuan Computer Full Set a lo pe tawh bawk a ni. 

College hi Evening Shift-a kal pui phawt tur niin Subject paruk - Education, Economics, History, English, Mizo leh Political Science te a bultan a ni a, Vairengte College hmun tur  hi Vairengte VC-II te chuan ram pe in College building an la neih hma chu Vairengte High School-ah Class an kal rih dawn a ni.

College thar hawnna ah hian bialtu MLA Lalrinsanga Ralte chuan Vairengte College chu Vairengte mai bakah a chhehvel khua te tan pawha chhenfakawm a nih ngei a beisei thu sawiin Vairengte College din a nih theihna tura sul lo su a, hma la tu Jt. VC, All NGO leh College Governing body te inpekna chu fakawm a tih thu a sawi. 

Lalrinsanga Ralte chuan, "Kan khawtlang ah hmasawnna awm a, Development thleng tura kan duh chuan tupawh a tithei, hmahruaitu an awm chuan chumi chu i zui ngam ang u. Risk la ngam lo tan hlawhtlinna a awmlova, hmahruai ngam an awm chuan i zui mai ang u," a ti bawk.

Serlui bialtu MLA chuan, MLA a nihlaia Vairengte College thar hawn a ni thei chu MLA a nih laia thil ropui a tawn te zinga mi a nih tawh tur thu sawiin Vairengte College hlawhtlinna atan theihtawp a chhuahzel tur thu sawiin Hlawh neih loh avanga College a tawp ai chuan a tam thei ang ber Fund ah a dah tur thu leh MLA-a thlan tlin a nih leh chuan kumtin cheng nuai sawm aia tlem lo College enkawlna atan MLA Fund atanga a dah ziah tur thu a sawi.