Aizawl : Vawiin August 24, 2021 khan Joint Village Council (Vairengte) & All NGO (Vairengte) leh Phainuam Village Council leh Saipum Village Council te chuan Aizawl Press Club-ah chanchin thehdarhtu lama thawkte an hmachhawn. He hunah hian anni lam khua te chuan 1875 Bengal Eastern Frontier Regulation leh Assam-in ramri inthenna atana an duh, 1933 boundary demarcation-ah duhthlan tur zawk an hre lo tih an sawi.
    
    Ramri chungchangah heng khua te hian an ngaihdan an thuchhuah neihah hian an tarlang lem lo a, tun hnaia hmasawnna an hmuh leh an hmalakna te an tarlang. Press mite zawhna an chhanna ang chuan tuna an luah chin chu tha tawkah an ngai tih leh hma lak leh na tur tlem chu awmah an ngai tih a hriat theih. 1875 ramri hi a taka kalpui theih a nih tur leh tur loh chu thuneitu an nih loh avangin sawi theih an nei lo tih an sawi a, 1933 ramri chu pawm theihah an ngai lo thung, chutihrualin duhthlan tur zawk pawh an hre lo. 

    Vairengte Joint VC Chairman R. Lalfamkima chuan ramri chungchangah hian sawrkar leh mipui duhdan lam chua an hriatpui loh thu a sawi a, chutihrualin India Union hnuaia awm kan nih miau avangin 1875 ramri chu anni lam hi chuan kalpui chi-ah an ruat lo tih a sawi. 1933 ramri pawh pawm theih a nih loh thu a sawi a, he ramri ang ramri hi siam fel anih chuan Vairengte lamah ringawt pawh Assam lama bet tur hi In 200 vel a nih tur thu a sawi a, Phainuam, Saipum leh Saihapui V lam pawh Assam lama bet tur an awm nual tur thu a sawi bawk. Ramri-ah hian remna siam tur chuan, a khawi lam tan pawh hloh leh chan huama inbiak chu tha tura an ngaih thu a sawi lang tel bawk.

    Vairengte joint YMA Chairman Zalawta chuan, "1875 ramri hi a takin kalpui ni ta se chuan, mi nuai 5 aia tam fe Mizoram lamah Assam mi an rawn bet dawn tihna a ni a, kan duh loh mikhual an tam hle ang. Bhaga Assembly constituency a voters ringawt pawh khu mi nuai hnih chuang an ni a, Kolasib district-a voters awm zat let hnih aiin an tam zawk. Hetiang zat ILP neih ngai lo an awm tur hi ngaihtuahngam chi-ah pawh a ni lo. Kum 1933 ramri Assam-in kalpui a duh hi a taka hman a nih chuan Assam lama bet tur an awm nual ang. Chutihrualin helai ramri bawra mi hausa ho chuan Mizoram-a beh hi an chak a, duh thala sumdawn theih an duh a ni," a ti.

    Tunhnaia ramri-a Assam Police ten Mizo te huan an thutchilh tih an pha lo a, Mizoram tan channa a ngaih theih a nih rualin, Mizoramin tun hnaia kawng engemaw zat a sial avangin Assam lam vai ten huan anga an neih tam tak chu Mizoram lam hian an chang te thung niin an sawi bawk.

    Joint Village Council (Vairengte) & All NGO (Vairengte) leh Phainuam Village Council leh Saipum Village Council te hian hetiang hian thuchhuah an siam a ni.    

1. Mizoram leh Assam ramri buai avanga harsatna thleng chungchangah kan sorkarin ram leh hnam chhanna tura a hmalakna hrang hrang, Mizoram Police deployment chungchangah te, Power & Electricity chungchangah te, Education chungchangah leh inkalpawhna kawng thar hmun engememawzat a min laihsak avang te leh a tul ang anga hma min laksakna avangin kan sorkar hotute, kan Chief Minister zahawm tak Pu Zoramthanga, Home Minister zahawmtak, Power & Electricity Minister zahawm tak, Education Minister zahawmtak, Serlui bialtu MLA zahawm tak Pu Lalrinsanga Ralte leh Officials te chungah keini Ramri dep khua, Vairengte, Saihapui ‘V’ leh Phainuam khua ten lawmthu kan sawi tak meuh meuh a ni.

2. Ni 26.7.2021 chawhnu lama Assam Police in Mizoram Police Duty Post an rawn luahlan la let leh tura inkahna thleng chunhchangah kan Mizoram Police te huaisenna fakawm kan tiin kan chhuang takzet a ni.

3. He ramri buaina chungchangah Opposition Party hruaituten party hamthatna atana la mai lova hnam thinlung pu a sorkar an thlawp tlat hi kan lawm em em a ni. Hei mai nilovin Mizoram khaw hrang hrang atanga min thlawpna piah lamah pawisa faia min tanpui avang te, mimal, pawl leh kohhran hrang hrang atanga sumfai min pek piah lamah tawngtaina lam thlenga min hriat reng thin avangin lawmthu kan sawi a ni.

4. He buaina avanga Media lam thawktute thanhnem ngaihna a ropui kan ti a. Social Media lam khawihtu hrang hrang leh K-Pop Fans ten thahnem ngai taka ram leh hnam tana an theihna an hman zawng zawng hi chhuanawm kan tiin ropui kan ti hle a ni.

5. Kan sorkar hotute, kan Chief Minister zahawmtak Pu Zoramthanga, Home Minister zahawm tak, Power & Electricity Minister zahawm tak, Education Minister zahawm tak, Serlui bialtu MLA zahawm tak Pu Lalrinsanga Ralte ten theihtawp an chhuah avanga kan lo suangtuah phak loh hmalakna hrang hrang te hi sawi hmaih har kan ti a, heng a hnuai a  mite hi an hmalakna kan han tarlan theihte a ni:-

1) Kawng – 
   1) Horticulture Farm – Aitlang Police Duty Post – 2.7Km
   2) Aitlang Police Duty Post – Middle Aitlang Police Duty Post –3Km
   3) High School Tuikhuah Road – Singkili Road (Vairengte) – 1Km
   4) Mizofed Petrol Pump, IOC Veng(Vairengte) – Phaisen – 16Kms
   5) Buarchep (Phainuam) – Buarchep Police Duty Post –1.5Km
   6) Leisekawt – Bankang Kawn Road(Saipum)  – 3.5km
   7) Bankang Kawn – Tusenhnar (Saipum) – 4 Km
   8) Bankang Kawn  – Chawilung (Saipum) – 1Km
   9) Saichang – Tuisenlui (Saipum) – 1 Km
 10) Buarchep Police Duty Post – Saihapui V –700mtrs (Laihtlang tura hmalak mek)
 11) Leitan – Sihpui Zau (Vairengte) – 1Km
 12) Sabual Mual – Aitlang Lui (Vairengte) – 1Km

2) Power & Electricity -
   a) Phainuam – Buarchep Leilet Phai Mizoram Police Post – Rs.33 Lakhs Sanction ( A ban phun mek a ni)
   b) Power Sub station(Vairengte) – Aitlang Mizoram Police Post – Hei hi proposal siam niin a hlawhtlin ngei rin a ni – 84 Lakhs (7Km).
3) Saihapui ‘V’ a Bengali School, Assam sorkarin kum 2010-a an rawn sak, Kum 2020 ramri buai laia Bomb chhiat tak chu Mizoram Sorkar hmalakna in Education Department chuan he School hmunah hian School thar sa in tunah sak zawh tawh a ni a, Zirtirtu pawh lak fel nghal a ni. Mizoram sorkar enkawlna hnuaiah a awm tawh a ni.

3) IR Company Headquarter -
   - He buaina avanga kan sorkar leh Serlui bialtu MLA chak tak Pu Lalrinsanga Ralte avangin Vairengte hmun ngeiah IR Company Headquarter dah tura Mizoram sorkarin min approve sak tawh avangin kan lawm em em bawk a ni.
      Hei mai bakah hian ramri buaina avanga Mizo hnamin harhtharna kan chang leh ram leh hnam hmangaihna thangtharte nuna tuh thara a awm hi lawmawm kan tiin, hun lokal lehzel turah hnam kan nihna vawng renga, inhmangaiha inpui tawn zel turin Mizoram Mipuite kan sawm bawk a ni.