October 24, 2022; Kolasib district chhung khaw hrang hranga 4-Lane in a tihchhiat ram neitu inzawm pawl 'Land Owners' Association' (Vairengte-Kawnpui Package 3-6 NH 06 & 306) ten naktuk, October ni 25 atanga tiamchin awm lo a Vairengte a kawngpui dan (road block) neih an tum chu sawrkar aiawhte nen vawiin a an inbiakna angin an thulh lailawk rih a, tun October ni 31, 2022 thleng sawrkar leh NHIDCL te hmalakna an ngaichang leh dawn.

Land Owners' Association, Kolasib district chairman Lalmalsawma Ngente hnen atanga ZALEN thudawn danin, vawiin lamah Kolasib DC John LT. Sanga chuan Land Owner's hruaitute biain, sawrkar hmalakna kal mekte a hrilh a, tunhnai a NHIDCL leh Forest ten Forest minister office an sawihona ah zangnadawmna sem theih loh chhan an sawi fel thawkhat thu thu te, NHIDCL hqrs. ah sem tura dilna vawiin ah thawn nghal a nih thu te hrilhin, ni 2/3 tal nghak turin a ngen a, mipui harsatna siam lo va tihfel theih an in rin thu a hrilh bawk.

Land Owners' Association chairman chuan, Kolasib DC ngenna chu an ngaihtuah tih sawiin, road block hrim hirm chu an duh a nih loh thu a sawi a. Kolasib DC in sawrkar aiawha a hmalakna ringtawk tura a ngenna pawm tha an tih thu te, chumi vanga naktuk a road block neih tur pawh thulh phawt tha an tih thu leh, tun thla October ni 31 thleng nghak ngaihchan a, chumi hnuah an beisei ang an hmu lo a nih chuan road block neih ni se tiin thutlukna an siam tih a sawi.