Aizawl January 23, 2024: Vawiin khan Disaster Management and Rehabilitation (DM&R) Minister K.Sapdanga leh PWD chantu Vanlalhlana te chuan Vaivakawn Zohnuai leiminna a hmunah an enfiah a. DC, PWD, DM&R, UD&PA leh Revenue Department official ten an tawiawm, Vaivakawn Local Council ten an lo dawngsawng bawk.

Sawrkar chuan he lai lei tla siam that a nih theihna tur hian cheng nuai 218 a ruahman a, sawrkar hmasa-in nuai 60 SASCI sum a lo dah pawh hman chhunzawmna tura ruahmanna siam a ni. Hnathawh hi a hmanhmawhthlak avangin PWD chuan Departmental Work-in he hna hi an thawk dawn a ni.

He hunah hian PWD hotute chuan hnathawh tawh dan leh chhunzawm zel an tum dan report an pe a, leiminna hmun hi ruah a sur chuan tla leh maithei dinhmuna a din avangin a rang thei ang bera hna thawh a tul thu an sawi a, lei tla leh mai thei hi fimkhur taka thenfai hmasak a tul tur thu an sawi a, kawng thlang lam Airport Road pawh khar zeuh zeuh a tul dawn thu an sawi bawk.