Aizawl: Hmawngbuchhuah khuaa khawsa mek, Rakhine raltlan mi 219-te chu naktip Thawhlehni (July 2, 2019) hian Myanmar-ah thawnlet turin ruahmanna siam leh a ni.

Zalen thudawn danin Myanmar raltlan Hmawngbuchhuaha awm mekte hi in leh lo an neih tawh avang leh rante vulha an inbenbel tawh avang te, Myanmar lamah an let chuan ei tur nei dawn lova an inhriat avangin kir leh hi an duh lo a, hetih lai hian sawrkar laipui chuan thawnkir ngei a tum avangin an haw nan hian hmalak chhunzawm zel a ni.

Tun tumah hian tharum leh tihluihna hmanga hawtir lovin Myanmar lam hian haw turin an thlem dawn a, India sawrkar pawhin an haw ngei duh nan kar khat chhung ei tur pai (pek) a tum nia thudawn a ni. Vawiin hian Rakhine raltlan hawtir chungchangah hian India leh Myanmar sipaite chu ramri-ah inbiak an tum.