Mizo musician hriat hlawh PB Lianhmingthanga chu tukin zing dar 4:25 khan kum 49 mi niin Aizawl Hospital-ah a boral a, vawiin chhun dar 12:00 ah vui a ni ang. 

PB Lianhmingthanga hi Dawrpui Vengthar-ah an cheng a, zaithiam lar Rebecca Saimawii nau a ni. Mizo band lar berte zinga mi Albatross-ah an keyboardist niin, a thiam zia sawi nawn a ngai lo. 

Tun hma atang tawhin zaithiam lar tak takte sound track a lo siam sak tawh a, rimawi huangah a thawh hlawk hle. A kutchhuak zingah hian Mami Varte album pawh a tel a, zaithiam dang emaw zat a lo thawhpui tawh bawk. 

Hla phuah lam pawh a mi sa viau a, hla eng emaw zat a phuah - chung zingah chuan Rintea sak 'I ropui nan' tih hla leh, Hlutei sak 'I lainatna' tih hlate pawh a tel. 

PB Lianhmingthanga hi Dawrpui Vengthar Presbyterian Kohhran Gospel Centenary Hall-ah thlahna hunserh hmanpui a ni ang a, Dawrpui vengthar thlanmualah vui liam a ni ang. Amah vuina hunserh hi ROAR! YouTube channel chuan live-in pechhuak a ni ang. Pastor B. Zohmangaiha'n a vui dawn a ni.