Aizawl: Tunhnaia China leh khawchhak ram thenkhata vawk natna leng mek, African Swine Fever chu Mizoramah pawh a len ve mai a hlauhawm thu AH&Vety department thawktute chuan Zalen an hrilh.

Vety mithiamte sawi danin African Swine Fever hi PRRS nen a natna lanchhuah dan a inang hle a, Laboratory atang lo phei chuan hriat hran a harsa tih an sawi a. PRRS vei chu an thi vek lo tih sawiin hetih lai hian African Swine Fever vei erawh chu zaa za (100%) an thih avangin a hlauhawm hle tih Zalen palai an hrilh a. ASF natna vang hian China chuan vawk nuai tam tak a suat a, he natna hi khawchhak ram thenkhat Laos, Malayasia leh ram dangah a len tawh avang leh a hmabak chu India thenawm Myanmar anih avangin leh a vaccine a awm loh avangin fimkhur a ngai hle tih an sawi a. Mipuite chu he natna laka an ranvulhte a him nan khawchhak lam atanga vawk lalut lo turin an ngen tih an sawi.

Zalen zawhna chhangin AH & Vety thawktute chuan ASF vei vawk chu mihring tan a hlauhawm lo a; mahse, he natna vei vawk erawh an thih zel avangin a hri a len hi a hlauhawm hle niin an sawi bawk.

Zawhna chhangin AH & Vety mithiamte chuan kuminah hrileng vanga vawk thi an awm an hriat loh thu an sawi a. Kum hmasa lam anga vawk thi a awm loh chhan hi state dang atanga vawk lakluh a awm loh vang te, a bikin khawchhak lam atanga vawk lakluh khapna mipui ten an zawm that vang nia an hriat thu an sawi a ni.