Zalen-in AH&Vety department thawktute hnen atanga thu a dawn danin Mizoram sawrkarin state dang atanga vawksa lakluh a khap chungin mi thenkhatten vawksa dah/vawn that (frozen) leh a repte a rukin an lalut thin niin an sawi a. Hengte hi man an nih chuan an phum zel tih an sawi. State dang atanga vawksa leh vawksa rep lak luh chu African Swine Fever kaidarh theihna a nih avangin sawrkar thupek chu mi tinin zawm se an duh tih thawktute hian an sawi.

AH&Vety department thawktu te chuan khawvel pumah vawk natna hlauhawm tak African Swine Fever chu a tlahniam hret hret nia an hriat thu an sawi a. Thenawm state-a he natna a lenna hmun Assam-ah chuan case thar an nei tawh lo a, Meghalaya-ah chuan case an la nei zauh zauh a, Manipur-ah pawh an la hmuh avangin fimkhur a tul hle niin an sawi a. Vanneihthlak takin Mizoramah chuan ASF hi hmuh a la ni lo a, vawk thi an enfiah te pawhin Africa Swine Fever an vei lo niin an sawi.

AH&Vety department hotute chuan tun lai hian hmun hrang hrangah vaccine an pe mek tih sawiin vaccine la tha vawkte chuan PRRS leh swine fever te vei mahse an ziaawm bik niin an sawi bawk.