Aizawl; Aizawl khawpui chhunga veng 15 bakah Tumpui veng, Kolasib leh P&E veng, Serchhip ah te LPG home delivery kalpui a ni tawh.

ZALEN in Food, Civil Supply &Consumer Affairs Department thawktute hnen atanga thu a dawn danin LPG home delivery hi a tira veng pali College veng, dawrpui, Zonuam leh Falkland veng te bakah veng 11 dangah te kalpui a ni a. Aizawl khawpui pawnah chuan Tumpui veng, Kolasib leh P&E veng, Serchhip ah te hlawhtling taka kalpui a ni tawh tih an sawi.

Indian Oil Corporation, FCS&CA department leh Aizawl khawpui chhunga Gas agency 11 te chuan an huam chhunga veng thlanbik 3 theuh ah te home delivery hi kalpui nise an ti a. Heng veng thlanbik 33 zingah hian lo kalpui tawhna veng 4 bak veng 29 ah kalpui tum anih laiin harsatna neuh neuh avangin veng 15 ah chiah kalpui theih a ni ta tih FCS&CA thawk te chuan an sawi.

"LPG home delivery kalpui theih a nih loh chhan hi chi hrang hrang a awm a. Veng thenkhatah chuan gas book tu an awm lo a, thenkhatah chuan book an tlem lutuk avangin agency te tan sem ngaihna a awm lova. Veng thenkhat chuan smart phone nei lo an tam tih an sawi a, chubakah ni lenga gas lo nghah kha harsa ti an awm bawk a, hmun thenkhatah chuan home deliver man Rs. 70 hi to an ti bawk a. Hei bakah hian Local Council thenkhat hi an la hmin chiah lo nia a lan bakah KYC update mek vang leh thildang neuh neuh eng emaw hi a la awm a ni," an ti.

LPG home delivery chu a tha nia sawiin FCS&CA thawk te chuan, "Tuna home delivery kalpui tawh veng hi inchhir an la awm lova, a hmaa point delivery anga kalpui leh hi an duh tawh lo a ni," an ti a. Tuna home delivery man bur khat zelah Rs. 70 chu Aizawl veng zawng zawngah kalpui anih hun chuan tun ai hian a hniam zawk dawn niin an sawi bawk.

LPG home delivery hi ni 5.9.2019 khan Aizawl veng 4 ah pilot projects angin kalpui tan a ni a. Hripui vanga hun engemaw chen chawlhsan anih hnuah ni 1.4.2022 atang khan veng thlanbikah te kalpui tura ruahman leh a ni.