Vietnam khawpui, Hanoi-a apartment block kangah mi 56 vel an thi a, thahnem takin hliam an tuar bawk.

Police chuan mi 37 hliam tuar an awm thu leh thi zinga mi 39 chu tute nge an nih hriat an ni tawh tih an sawi.

Zan lam atanga chhuak kangmei hi thelh mih a ni tawh a. A in neitu hi man a ni tawh bawk.

Khawpui thang chak tak, Hanoi-ah hian thuneitute chuan in sak tharte chuan kangmei laka himna tura dan zam an zawm lo nasa tih an sawi.

Kum 20 lek liam ta chhungin khawpuia mihring cheng hi a let li zeta pungin tunah chuan mi maktaduai 5.25 zet an cheng tawh.

Kangmei chhuah chhan hi chhui mek ni mah se a hmutute chuan motorbike an hun khah vekna hmun lirthei hunna chhawng (floor) atanga chhuak niin an sawi.

Mi chengte chuan Thawhlehni zan dar 11:00 (India-a zan dar 9:30) velah thil puak ring tak an hria a, meikhu a chhuak zui nghal nguah nguah niin an sawi.

Chhungkaw pakhat chuan an tukverh dalna, thira siam tichhiain leilawn dawhin an thenawm ina pakaiin an him niin an insawi.

A bul hnaia cheng nu pakhat, Hao-i chuan, “Mi pui tura mi au an tam hle a; mahse, mi tam tak kan tanpui thei si lo,” tiin AFP news agency a hrilh.

“Apartment hi a inhnaih lutuk a, tlan chhuah ngaihna a awm lo va, tuna thi tate tan pawh hian hmun him pan ngaihna a awm lo,” tiin a sawi bawk.

Kang thelh tur hian engine 15 lai tirh an ni a; mahse, a panna kawng a zim em avangin a bulhnai tak erawh an thleng thei hlawm lo.

Khawpui khawthlang lama ruang dahna hmunah mi thahnem tak awm khawmin thi zingah an chhungte a tel ve em tih an ngaihven hlawm.

“A nu nena ina awm ka fanu ka chân ve,” tiin pa pakhat chuan AFP hnenah a sawi a. “Ka nupui chin ka la hre lo va, a tel ve loh hram ka beisei,” a ti bawk.

Police chuan in neitu, Nghiem Quang Mihn chu kangmei laka himna tura dan zam a zawm loh avangin man a ni tih sorkar thuchhuah chuan a tar lang a, chhui zui mek a ni tih an sawi bawk.

Heng lai vela khawpui inenkawlna tha lo chunga hmasawn chak ber ni sia kangmei rapthlak tak chhuak hian himna atana dan zam zawm a nih loh thinzia a tilang chiang hle nia ngaih a ni.

Nikumah pawh khan Vietnam chhim lama karaoke club-ah mi 33 zet an lo kang hlum tawh a, hetah pawh hian an tukverh chu leirawhchana rem phui niin tlan chhuahna a awm miah lo a ni.

Asia khawmualpui chhimchhak lam, Thailand thleng pawhin kangmei rapthlak tak tak a chhuak fo thin a. Heng hi dan zam zawm a hlawh tawk loh thin vang bakah kengkawhtute pawhin an kenkawh that thin loh vang a ni bawk.