ZALEN January 14, 2025 : All Mizoram Village Council Association ten sawrkar dinglaiin Village Council term a pawhtawi vanga High Court-a an zualkona an hnuhdawh hnuah vawiin (14.01.2025) Thawhlehni khan AMVCA President K.Lalngaizuala hmingin High Court-ah sawrkar order khinna (Writ Petition) an thehlut leh.

All Mizoram Village Council Association President K.Lalngaizuala hnen atanga Zalen thudawn danin All Mizoram Village Council Association chu sawrkarah register a nih loh avangin AMVCA hminga an thehluh chu an hnukdawk a, mahse AMVCA President hmingin an thehlut leh tih sawiin Court pawh a pawm a, a ngaihtuah ngei an beisei tih a sawi.

K.Lalngaizuala chuan High Court hian 16.01.2025 Ningani ah a list anga, hemi ni hian a case hi sawi nghal turin an beisei tih a sawi a. “He thil hi party politics anga lak chi a ni lova, VC kal leh zel turte zahawmna humhim nan leh democracy ram kan nih anga democratic taka thil a kal zel theih na tura VC General Conference thu pass bawhzui zelna a ni,” a ti bawk.