June ni 6, 2023: Chief Minister Zoramthanga chuan vawiin khan Hnahthial ah kalin, Deputy Commissioner office Complex sak hna thawh mek leh PWD Complex a circuit house sakna tur te a hmunah tlawhin a enfiah. Chief Minister chuan vision thui tak nen thahnemngai taka beihin ram entawntlakah insiam theih a nih thu a sawi. 

Chief Minister chuan ram changkang leh upa, kum za tél hmasawnna lo kalpui tawhna te anga ram siam ve tur chuan kum hnih khat chauh a tawk loh thu leh, hmathlir (vision) thui tak nen thahnemngai taka beihin ram entawntlakah ram a la siam theih thu a sawi. He hamthlir tihlawhtling tur hian tunah pawh theitawp chhuah a hma lak zel a nih thu a sawi. Chief Minister chuan ram hmasawnna atan a ram neitu te chu a enkawltu nih a pawimawh a ti a. Hnam thinlung put hi ramin a mamawh a ni tiin ram siamtha tur chuan ram mi leh sa bak an awmloh avangin ram mipuite chu ram hmangaihna nen a thawkho zel a pawimawh thu a sawi.

Hnahthial PWD IB-a thu a sawi naah Chief Minister Zoramthanga chuan Hnahthial khawpui chu district headquarter entawntlak taka siam tum a nih thu a sawi. District thar puan a nih hnu ah sawrkar chuan DC office dinna tur district thar pathum tan Rs. 10 crores theuh sum dah a nih thu leh theihtawp a harsatna kara hma lak a nih zel thu a sawi. District thar pathum a hmalakna te a enpui dan leh a daihzai zawnga DC hmunhma chu office pakhat aia tam te'n an hman tangkai tura ruahman a tul thu a sawi a. Khawtlang mipui te pawhin thahnemngai taka khua leh district hmasawnna turah an lo tawiawm zel a pawimawh thu a sawi.

PWD engineer leh architect te nen circuit house sakna tur hmunhma enfiah nghal a ni a. Chief Minister hian DC office complex ah thing a phun bawk a. DC office a thawktute nen inkawmna hun a hmang bawk. DC Complex ah hian DC office bakah Revenue leh ICT te an awm a. A bulah UD&PA office awm bawkin, a bulhnai sawrkar ramah department dang office sak tura ruahman zel a ni bawk.