August 25, 2023; Mamit Chhimveng Vohbik naupang Lalremruata (11) boral chungchangah police ten mi 10 chuang thu an zawtfiah tawh a, vawiin lamah All NGO te leh Mamit police hotuten inbiakna an nei ang.

Mamit Chhimveng All NGO chuan August ni 25, 2023 ral hma ngei a pawikhawihtu chhuichhuah an phut tih thuchhuah an lo siam tawh a ni.

Vanlalhruaia SDPO Mamit chuan mi hrang hrang mi sawm zet thu zawhfiah an ni tawh tih a sawi a, he pawikhawihna a inhnamhnawih ni a rin mi pahnih kawlin nimin khan Court atangin darkar 72 kawl phalna an la tih a sawi. Forensic Science Laboratory atangin report an la dawng lo tih sawi bawkin, PME result erawh an dawng tawh.

Tarlan tawh angin, thuchhuah an siamah Mamit Chhimveng All NGO chuan, August ni 18 atanga bo, August ni 23 a a ruang hmuh a nih chungchangah an veng mipui an lungawilo hle tih tarlangin, a ruang saruak leh chhawl chhin thlap a hmuh a nih avangin, mi kuttuar a nih ngei an ring tih an tarlang a. He pawikhawihna a inhnamhnawihte hi a rang thei ang ber a chhui chhuak a, hremna pe ngei turin thuneitute an phut a, August ni 25 hma ngei a chhui chhuah a nih loh chuan, Mamit Chhimveng mipuiin an thiam dan anga hma an lak tur thu an tarlang bawk.

Hemi chungchangah hian vawiin ah Mamit police hotute leh All NGO ten inbiakna an nei sawn nia thudawn a ni.