Territorial Salvation Army Youth Council (TSAYC) buatsaih India Eastern Territory huam chhunga SAY member te zaia intihsiakna, Voice of Salvationist chu Zirtawpni zan khan zawh fel a ni ta a, Tlanmgnuam Corps nula Vanlalruati chu pakhatna a ni. Pahnihna chu PC Lalrinliani, Chanmari West Corps a ni a, Angela Zonunmawii, Lily Veng Corps chu pathumna a ni. 

Intihsiak kharna leh result puanna hun hi Dawrpui Multipurpose Center-ah neih a ni a, Hall-a leng lo khawp mipui an pungkhawm. Top 5 ten intihsiak hmachhawn lehin hla pakhat theuh an sa a, boruak sang takah pawh an zai tha hlawm leh pek hle. Angela Zonunmawii chuan 'Min kian san suh' tih hla hmangin a rawn khuh hawng a, a zaithiam zia leh a aw mawi zia chu pui tak a ni. Judge te pawhin an fak a, top 3-ah a lang phak hi a mak lo. 

Dennis Lalbiakkaia, Chanmari Corps leh Liansangpuii, Khatla Corps te an zai zui a, an ni pawh an che chhe lo. PC Lalrinliani,  Chanmari West Corps a zai zawh hnuah Vanlalruati, Tlangnuam Corps chuan hnu a rawn khar a, result puan zui a ni. 

Lawmman
Voice of Salvationist 2023-a pakhatna Vanlalruati hian lawmman pawisa fai Rs. 50,000 bakah, thilpek thahnem tak a dawng. Pahnihna PC Lalrinliani hian Rs. 30,000 leh thilpek a dawng a, pathumna Angela Zonunmawii hnenah Rs. 20,000 hlan a ni bawk. 

He zai intihsiakah hian Eastern Territory huam chhunga SAY member mi 107 an tel a, August 9 khan Woodland Hills, Zonuam-ah first round tan a ni. First round atang hian top 30 thlan chhuah niin, August 12 khan intihsiak an nei a, top 10 thlan zui a ni. Top 10 atang hian Grand Finale atan mi 5 an tling a, a tawpah Tlangnuam nula Vanlalruati a ding chang ta a ni. 

Musician te : 
Guitarist - Philip V.L Rinpuia, Bazar Corps & Andrew Lalchhandama, Gilgal Corps
Keyboardist - Zta Khawlhring, Bazar/Saitual Corps
Bassist - John Zonunmawia, Khatla Corps
Drummer - Erick Chenkual, Temple Corps

Voice od Salvationist Result 
Pakhatna - Vanlalruati, Tlangnuam Corps
Pahnihna - PC Lalrinliani, Chanmari West Corps 
Pathumna - Angela Zonunmawii, Lily Veng Corps