Russia chuan Wagner chief Yevgeny Prigozhin-a a thi tel nia sawi thlawhna thlaa ruang 10 leh flight recorder-te chu hmuh an ni tawh tih a sawi.

“Molecular-genetic test tih mek a ni,” tiin chhuituten an sawi.

Thlawhna hi Nilaini tlai khan Moscow bulah tlain bomb emaw, missile-a kah emaw nia rinna a tam hle.

Thenkhatah chuan Kremlin-in Prigozhin-a that tura thu a pek anga tih nia sawi a awm a, Russian President Vladimir Putin-a thupuangtu erawh chuan ‘dawt vek’ a ti thung.

Putin-a lamtang rinawm tak ni thin, Prigozhin-a hian June thla khan a sipai indo mite nen an hel a ni.

An hel lai hian Putin-a hian ‘mi phatsanna’ tiin a sawi a. A hnuah Wagner mercenary nen inremna siamin Russia sipai pangngai zawm emaw, Moscow thian tha, Belarus rama awm emaw turin an inti zui.

Inremna nei mah se a hote nena an hel hnuah hi chuan kum 62 mi, Prigozhin-a hi ‘mitthi kal’ tia sawiin Russian president hian a ngaidam hlen tak tak dawn lo niin an ngai.

Zirtawpnia thuthar lakhawmtute nena an inkawmnaah Kremlin thupuangtu, Dmitry Peskov chuan Nilainia an khawpui hmarthlang, Tver region-a thlawhna tlaa mi 10 thihna ‘lungchhiatthlak tak’ chungchangah ‘rin thu’ a tam thu a sawi.

Embraer Legacy 600 jet thlaah hian Prigozhin-a leh a hnungzuitu, Dmitry Utkin bakah mi chuang dang panga leh thawktu pathum an thi niin passenger list-ah a lang.

“Khawthlang ramten kil hrang hrang atangin rin thu an vawrh a. A vai hian dawt vek a ni,” tiin Peskov chuan a sawi.

“Tunah hian thil chiang lo tam tak kan la nei a, kan chhui meknaah hian finfiah zel a ni ang,” a ti.

Thlawhnaa chuangte hming list ziahna bak hi chu Kremlin-in Prigozhin-a hi a chuang ngei tih finfiahna a nei rih lo tih Peskov-a chuan a sawi bawk.

An hotupa a thi a nih chuan Wagner kal zel dan tur pawh hriat a ni rih lo va, zawhna a awm mek bawk.

Zirtawpni khan Belarus hruaitu, Aleksander Lukashenko chuan an ramah Wagner fighter 10,000 vel an la awm thu leh an awm zel theih tur thu a sawi.

Hetih lai hian mi thiam eng emaw zat chuan Lukashenko-a’n hetiang a sawi hi Kremlin thupek zawma a tih ve mek niin an ngai.

President Putin-a hi thlawhna a tlak atanga darkar 24 dawn engmah sawi lovin a ngai a, a tawpah thi chhungte a tawrhpui tak zet thu a sawi chhuak chauh.

Prigozhin-a chu ‘pa talent tha tak’ a nih thu a sawi a, ‘a nuna tihsual pawi tak nei’ tiin a sawi bawk.

Rinhlelh kai thihna

Prigozhin-a chuanna nia ngaih thlawhna a tlak atang khan rin thu a tam hle a, Putin-a mizia hre chiang tam takin sorkarin a hel avanga a chunga phuba a lakna nia ngai an tam a, thu a tam hle.

Pentagon chuan Wagner chief hi thah a nih a rinawm hle tih a sawi a. Hetih lai hian US hotu sang pakhat chuan thlawhna a tlak chhan kha a chhunga thil puak vang a nih a rinawm hle niin CBS News hnenah a sawi ve bawk.

Thlawhna a tlakna, Tver region-a khuaa chengte chuan thlawhna kha lei lam pana a tlak hmain thil puak ring tak an hria niin an sawi ve mek bawk.

Hetih lai hian Prigozhin-a leh a pawl nena inzawm Telegram channel pakhatah chuan thlawhna kha Russian thlawhna kahna hmangin kah niin an tar lang ve bawk a. He thil hi finfiahna a la awm lo va, Pentagon pawhin kah a ni tih finfiahna tur tha tawk engmah a la awm lo niin a sawi ve bawk.

Prigozhin-a hi Moscow-in Ukraine a run meknaah a sipaite nen an thawh hlawk hle a, hetih lai hian a sipaite hi Kremlin hotuten an mamawh an pe tha tawk lo nia ngaiin a sawisel fo tawh thin a. June thla khan a lungawi lohna chu helnaa tilangin khawpui panin a chhuak ta hial a. Mowcow a thlen hmain inremna siampui a ni thei ta a ni.