Aizawl August 20, 2024 : Ward VI Congress & MNF Campaign Committee chuan AMC By-Election lo awm tura ZPM Supporter nia ngaih Gilbert Ralte chuan thu belhchian dawllo tak puangin John Zosangliana Ralte (L) chu a nupui Tangrual Candidate a nih avangin na takin dawtin a rawn puh a. Hemi chungchangah hian Ward-VI mipuite’n thudik an hriat a, thu tlukna an siam thiam theih nan tiin thuchhuah an siam.

Congress & MNF te chuan Chanmari West Bazar tur chungchangah hian 06.02.2024 khan John Zosangliana Ralte (L) hmalaknain AMC Corporator te pawn Bazar hmun tur hi an en ho a. LSC pawh John Zosangliana Ralte (L) hnenah hian kawltir a ni ngei a. Nimahsela Gilbert Ralte hian thudik chanve hmangin LSC pawh kawl bet tlat a, pechhuak duh lo ang hiala a ziak chu Local Council Chairman hlui ngei hian Johna hnen atangin a zin hma khan a lalet tawh zawk an ti.

MNF leh Congress te chuan John Zosangliana Ralte (L) hian he Bazar hi tihhlawhtlin ngei a duh a, hmalak mek a nih laiin 21.03.2024 ah khan vanduaithlak taka a boral hnu thlenga hetiang anga chhia leh sual em em anga ZPM support-tu Gilbert Ralte hian John Zosangliana Ralte (L), Chanmari West chu Media kaltlanga a puh chu mak an ti.

John Zosangliana Ralte thih hnu hian Chanmari West Local Council chu tihdanglam a ni a. Tuna Local Council te hian 05.07.2024 khan Executive Corporator, Deputy Mayor leh Mayor te va hmuin AMC hian hmalakna hi chhunzawm lova sawrkar lam atanga hma la tura an beisei zawk thu ziakin an thlen a ni, an ti.

Ward-VI mipuite chu John Zosangliana Ralte (L) nupui Lalrinfeli (Mafeli) vote sak theuh turin an sawm bawk.