Aizawl May 19, 2023 : Mizo Bawngsa Zuar Association (MBZA) ten May 13, 2024 hnu lama bawngsa zuar tawh lo tura an chah hnuah, hnam dangten an bawngsa zawrh an bansan hlawm rih nia thudawn a ni.

MBZA hruaitute hnen atanga ZALEN thudawn danin, MBZA ngenna chu bawngsa zuar hnam dangten tha takin an zawm a, he thu ziah lai, nimin thleng kha chuan Aizawl khawpui chhungah bawngsa zuar hnam dang an awm tawh rih lo va. An zawrh loh mai bakah hian talh tur ran la pawh an awm lo nia hriat a ni.

MBZA chuan an dinnaah an ding reng dawn niin an sawi a, an ngenna zawm loa zuar lui hnam dangte chu a tul ang zelin an chungchang an ngaihtuah zel dawn niin an sawi.

Mumal taka chhinchhiah hleih theih ni lo mah se, Mizoramin kar khata bawngsa a ei ral chu 150 bawr vel nia ngaih a ni.

May 8, 2024 khan MBZA hruaitute chuan Aizawl Press Club-ah thuthar thehdarhtute kawmin Mizorama hnam dangten inner line permit (ILP) pek an nih anga hmang loa bawngsa zuar an awm thu leh an ngaimawh thu an sawi a, May 13, 2024 hnu lamah zuar tawh lo turin an chah.

MBZA hruaitute chuan May 13, 2024 hnu lamah chuan hnam dang dan loa bawngsa zuarte chu inthiarfihlim tur leh bawngsa zuar tawh lo turin an chah a, “Mizo mahni hming hawhtirte leh hnam dang thurualpuitute zawng zawng pawh titawp turin kan inhriattir a ni. He thu ngai pawimawh loa ti luite chu an chungah eng pawh thleng se an sawi buai thei lo ang,” an ti a, an hmalakna tawiawm turin khawtlang hruaitute leh mipui an ngen.