Aizawl : Republic Veng Kohhran chuan vawiin hian Kohhran Upa thlang tura a inbuatsaih mek laiin Social media (WhatsApp) lama campaign ang zawng rawngkaia thu a darh avangin an Upa thlan tum chu an thulh leh a, a hun tak erawh an la ruat leh lo.

Republic Veng Kohhran committee chuan hemi chungchang hi Inrinni zan khan a ngaihtuah a, thutlukna hmanhmawh tak siamin, "Naktuk ni 30.01.2022 Pathianni chawhma a kohhran upa thlan kan tum chu, kan kohhran chhungah thil thleng thei leh thleng turah pawh kan ngaih loh thil tha lo tak thleng a awm avangin, thulh a ni tih kohhran ho te kan in hriattir e," tiin thuchhuah an siam nghal a ni. 

"Kohhran upa thlang tura kan in buatsaih chhoh mek laiin , Social media WhatsApp group thenkhatah  kan mi duh zawng te hming ziakin kohhran upa atan a thlang tura ngenna thehdarh a ni a. Upa ten hei hi kohhranin kan tih ngai loh leh kan duhloh tawp thil a nih thu kan inhrilh hnuah, midangin hetiang thu tho hi tumhnih lai post an siam hmuh tur a awm zui leh tak avangin. Kohhran committee chu ni 29.01.2022 zan tlai tawh takah in rawn khawmin,  kohhran zahawmna te a thianghlimna te leh a dikna te vawn nun zel a nih theihna turin, Kohhran Upa thlan kan tum chu kaltlangpui loh tha zawkin a hria a, kan thulh ta a ni. Inthlan hun tur chu a tul angin kohhran committee in a la ngaih tuah leh ang. Kohhran mipui te hriat thiamna pawh a ngen nghal bawk e," tiin ngenna an siam bawk.

Republic Veng Upa hnen atanga ZALEN thudawn danin kar hmasa lam khan rawngbawltu group lamah campaign rawngkai deuh hi mi pakhat chuan post a siam a, hei hi Upa lam chuan thu awmzia hrilh delete turin an ti a, amah pawh hian ngaihdam a dil zui a ni. Kar hmasa chho khan rawngbawltu group pakhatah hetiang rawngkai bawk hian mi pakhat chuan thlan tur list a siam leh a, hei pawh hi khak nghal niin amah pawh hian ngaihdam a dil bawk. Zirtawpni khan Republic Venga YMA section group pakhatah mi pakhatin thlan tur list ang chi a tarlang leh a, amah hian a delete rang viau a, mahse, screenshot hman an awm avangin a darh leh ta tho a. Kohhran committe chuan thil kal fuh loh awm thei nia an hriat avangin Kohhran Upa thlan loh hi an titlu ta a ni.