Chinese official te hian an ram chhunga tun dinhmun Covid an inkaidarh  dik tak hi an puang tur a ni, tih chu World Health Organisation (WHO) thutlukna thar ber a ni.

Tun hnai chho khan China chuan an ram chhung hmun thenkhatah khuahkhirhna a lek chu a thlahdul chho mek a, mahse, ram tam tak chuan China atanga an ram lut khualzin te chu test an nei hlawm.

WHO chuan hospital-a awm zat te ICU-a awm zat te leh thi zat data dik zawk pe chhuak turin a duh a, Vaccine an pek tawh zat an hre duh bawk.

The United States, Spain, France, South Korea, India, Italy, Japan leh Taiwan chuan China atanga an ram lut te chu Covid test an neih sak vek a, he virus hi a darh leh hluai an hlau a ni. England phei chuan China atanga an ram lut tur te chu negative test an neih phawt an phut a ni.

China-ah hian inkhuahkhirhna an kalpui leh thut avangin November khan sawrkarin he natna a kalpui dan duh lovin lungawi lohna lantir a ni a, hetih lai hian China chuan Covid laka an him theih nan hmalakna hautak zet kalpuiin, zero-Covid policy chu a lekkawh a ni.

WHO in a tarlan danin  Covid 19 hluar zelah China chu high level meeting nimin December ni 30 khan a neihpui a, January ni 3, 2023 hian Technical Advisory Group on SARS-CoV-2 Virus Evolution neih tur a ni a, WHO chuan China mithiamte chu hemiah hian chipchiar takin viral sequencing leh thil pawimawh dangte pe turin a ngen a ni.

WHO hotute chuan China hmun hran hranah Covid 19 dinhmun enfiahin, he hriin nghawng a neih dante, thi zat, benvawn natna nei leh kum upatte vaccine pek bakah China dinhmun dik tak inhrilh tawn thin tura an phut thu an sawi nawn leh a. WHO lam atanga mithiamte ngaihdan hmanga puih a inhuam thu WHO website ah tarlan a ni a, a hun taka 'data' tihchhuahte, chu chuan khawvel ram dang  a nghawng dan tur bakah inpuahchah dan tur a hril thute chu pawimawh a tih zing ami a nih thu tarlan a ni bawk.