Aizawl Municipal Corporation Chairman chuan hrui thlun ngai loa phone emaw computer atanga internet hman theih dan ‘wifi’ chu tunlai hian an buaipui mek thu media mite a hrilh a. Khawlai teihawi pahin a thlawna internet-a thil tih tur leh pawimawh neite tan chuan AMC sawrkar thar ruahmanna hi a samkhai sawt a rinawm. Tunah hian hmun thenkhatah wifi hi enchhin mek a ni a, hmun dang pawh la tihlehna tur hual a ni tawh a ni. Wifi awmna leh a chheh vel hmun engnge maw zah chu a huam dawn a, a hmang duhte chuan helai hnaih hi panin a thlawnin internet an hmang tawh mai dawn a ni. Ram hnufual, hmun kilkhawr leh connectivity chhe takin a nawr kal tawng tawng ram kan ni nachungin ram chhunga cheng mipuite erawh hi chu Information/ Communication Technology lamah an mikhual lo hle a. Chhungkaw tam zawkah 'ICT device' a awm deuh vek a, smart phone phei chu mi cheng tam zawkin kan hum deuh vek awm e. AIR leh TV te chuan vawiin thlengin mipui hrilhhriat hna an la thawk a, mi tam takin an la chhawr hle a, hun engngemaw chhung chu medium hman lar bel pawl a la nih chhoh zel a rinawm. Khawthlang khawpuiah te pawh mipui hman tangkai turin wifi hi a thlawnin khawlaiah chhawp chhuah a nihna a rei tawh a, mipui lamin an tangkai pui a.Wifi awm lohna hmunah chuan Internet hman man chawi a ngaih thin avangin zirlaite leh zirbing mite tan harsatna a awm thin a, mahse wifi bunna hmunah chuan an chhawr tangkai hle a, kawng lehlamah erawh chuan suahsual rawngbawl nan te pawh hman a ni tawh thin a ni. Ram rethei tan phei chuan khawlaia wifi dah hi malsawmna a ni thei hial ang a, kan khawpuiah ngei pawh chhawr tangkaina tur a tam thei hle ang. Kawng lehlam thlir erawh chuan hemi let thawk pawhin a chhe zawngin nghawng a nei thei hial awm e. Thiamna a sang a, inkawmhlimna hmanrua a danglam zel a, computer tluk zeta phone chak an awm tak hnu phei chuan changkanna kan tih hian tawpin tai a nei hlei thei dawn ta lo emaw tih mai tur a ni. IT lama thiamna hi a zung lam aiin a lerah kan thuai nasa ta mah mahin a lang a. Mi thenkhatin computer aiin phone an tangkaipui tawh zawk a, kalna apiangah in ah buai luk luk ngai tawh lovin ipteah an ak bo tawh mai thin a. Hetih rual hian phone a social media bih ngur ngur tam tak chu ‘internet khawih thiam lo Facebook chiah thiam,’ niah an inchhal thung bawk. Ni tina khawvel mipui maktaduai 100 tel tak meuhin an khawih rawn Facebook neitupa Zukerberg chuan kum kalta khan kar khata lehkhabu chhiar zawh ziah a intiam a, a intiamna hi a hlen chhuak a, tunah hian kumin 2016 hi km 365 tlantlin kumah hmangin ni tin a tlan ngat ngat a. Chutih laiin mipuite chuan chinlem nei lovin A siamchhuah internet-a inkawmna chu hna thawk hman mang lovin an buaipui thung a ni. Khawpui wifi pumhlum a nghahhlelh awm rualin a zung ni loa ler atanga buaipui tawk vel kan nih avang hian hmasawnna awm lem lo sawrkar sum tihektuah a tang thei tih kan hriat a pawimawh khawp mai. IT dan hriatna lamah kan la hniam hle a, dan pawh awm lo mah se, ‘mahni chhiat leh tha hriatna’ hmangin Danin a khap chintawk awm vel hi chu mipangngai tan chuan thil har ni theiin a lang lo. Engpawh nise AMC hmalakna hi a fakawm viau a mipui lamin dan zawm leh hriat belh tumin tha thar khawh tum ila. A chhiara chhiar chu engti kawng mahin a ena en chi chuan an tluk tak tak thei lo ang.