ZALEN, October 27, 2025: Women’s U-19 T20 Trophy 2025-26-a an inlan hmasak bera Nagaland an sawp hnuah Thawhtannia an inkhelh vawi hnihnaah Mizo tleirawlten run 101-in Manipur an hneh leh a. Mizoramin hnehna an chan nana pawimawh ber chu run 92 vaw chhuaktu, Vanlalruatpuii a ni.

Bharat Ratna Shri Atal Bihari Vajpayee Ekana Cricket Stadium B, Lucknow, Uttar Pradesh-a Plate Group inkhel vawi hnihnaah hian thumvawrah chak zawk, Sikkim-in vawm hmasak an thlang a, an tisual a tih theih.

Mizoram opening batter/wicket keeper Ruatpuii’n Sikkim bowler-te ball vawm a vuaksak nasa hle a, half century a siam hnuah pawh duhtawk lovin ball 66 a hmachhawnah run 92 zet a vaw chhuak a, ball khal la awmah a run out hlauh a ni.

Ruatpuii bakah hian Karie Chakma-i’n run 27 a vaw chhuak bawk a, over 20 chhungin run 141 siamin mi pali chiah an thi. 

Mizoram vawm hunah Sikkim batter-ten an ngam lo hle a, opener chu run siam lova Saron Lalremkimi’n a vawm chhuah hnuah mi dang pawh an talbuai chhunzawm a. Batter 11 thawk chhuakah pakhat chiah run 10 siam tling an awm.

Over 13.1 lekah run 40 chiah siamin an thi vek a, Mizoram tan captain Jacinta Laltanpuii’n pathum vawm hlumin Saron-i leh Sandhia Rai ten pahnih ve ve an vawm hlum bawk. 

Mizo tleirawlte hi Plate Group-ah vawi hnih khelhah chak ve vein Manipur nen point riat an hmu tawh a, net run rate 4.169 neiin thenawm state aiin an dinhmun a sang zawk a, hma an hruai a. Manipur nen hian Nilainiah an inhmachhawn dawn nghe nghe.

Board of Control for Cricket in India (BCCI) buatsaih Women’s U-19 T20 Trophy 2025-26 Plate Group-ah hian Mizoram hi Nagaland leh Sikkim bakah Arunchal Pradesh, Manipur leh Meghalaya te nen awmin an inkhelh kual vek hnua a sang pahnihin November 4-ah final an khel ang.

INKHEL CHANCHIN TAWI:

Mizoram 141/4 (20 overs)

Vanlalruatpuii - 92 (66)

Karie Chakma - 27 (30)

Sikkim - 40/10 (13.1 overs)

Jacinta Lalṭanpuii - 3/8 (2 overs)

Saron Lalremkimi - 2/4 (3 overs)

Run 101-in Mizoram an chak.

MIZORAM KHELH HMABAK:

October 29, 2025 - Manipur vs Mizoram

October 31, 2025 - Arunachal Pradesh vs Mizoram

November 2, 2025 - Meghalaya vs Mizoram