ZALEN, Mar. 10, 2026: Women’s U23 One Day Trophy Plate-ah Mizo nulate chuan group stage khelh zawhah a sang ber ni chungin final an lut a. A hmaa an lo hneh loh tawh, Sikkim nen Zirtawpni hian final an khel ang.

Plate-a state paruk inelnaah Mizoram hian khelh ngaah vawi thum hnehna changin point 12 an hmu a. An point hmuh zat ang bawk hmu dang - Sikkim, Nagaland leh Manipur zingah net run rate (NRR) nei tha berin a chung ber an luah a. An hnuai chiaha awm nen final hi an khel dawn a ni.

Mizo nulate hian Nilainia group stage inkhel hnuhnung berah Meghalaya chu run 14-in an hneh a. GMSSS Sec-26 Cricket Ground, Chandigarh-a inkhelah hian thum vawra chak Meghalaya-in vawm hmasak an thlang a, Mizoram hi over 46.2 chhunga thi vekin run 177 an siam.

Mizoram tan hian Saihmingliani’n run 50 vaw chhuakin Karie Chakma-i’n run 41 a thawh bawk.

Meghalaya-in an umnaah Cheanchi-i’n run 60 thawh mah se a thiante zingah run 15 vaw chhuak tling pawh an awm lo va, over 49.2-ah run 163 tlinin an thi zo.

Mizoram tan Margareth Malsawmliani chuan wicket thum lain run 27 a pe a, Thelma Laldinthari leh ZD Lalnunhrili ten mi pahnih ve ve an vawm hlum bawk.

Mizo nulaten final-a an hmachhawn tur, Sikkim nen hian group stage-ah Ningani khan an lo inkhel tawh a. Jacinta Laltanpuii'n run 120 zet vaw chhuak mah se run 44-in Mizoram hi a tlawm zawkah an lo tang tawh a, Zirtawpniah phuba lakna remchang an nei dawn a ni.

Champion hi season tharah a thiam rual inelna, Elite Group-ah an kaisang dawn a ni.