Aizawl August 21, 2024 : Airport Authority of India emaw Third Party emaw hnena Lengpui Airport hlan tumna a awm em tih Assembly House-a zawhna a chhanna atangin Chief Minister Lalduhoma chuan 'Working Committee to Look the Maintenance and Mangement of Lengpui Airport' te chu zirchian tir a nih thu a sawi.

Lengpui Airport hian January 1, 2024 leh July 31, 2024 inkarah Cheng 4,38,98,500/- a lalut a, Kumin January khan 2,22,000/- a lalut a, February-ah 1,12,000, March - 35,000, April - 1,44,800, May - 2,27,400 an lalut a, June-ah hian Thawlhna service ten an chawi thin User Development Fee (USF) & Aviation Security Fee (ASF) an dawn avang leh Hoardings man an dawn avangin a sang a, 4,09,41,800 an lalut a, July-ah khan 22,15,500 a lut leh bawk.

Lengpui Airport enkawl nan hian 2020-21 khan thla tinin Cheng Nuai 359.43 sen a ni a, 2021-2022 khan inenkawlna hi tla hniam hretin Cheng Nuai 305.37 thla tin hman a ni, 2022-2023 -ah khan thla tin Cheng Nuai 291.19 hman thin a ni a, 2023-2024 kha chuan thla khata Cheng nuai 117.04 hman niin a tlahniam. Henga sum an hmanah hian Annual Operational Expenditure (thawktu hlawh tiamin) leh Capital Expenditure te a tel a ni.

Hetihlai hian Lengpui Airport-in thla khata a sum lakluh chawhrual chu 2020-2021-ah khan thla khata Cheng nuai 0.73 a ni a, 2021-2022-ah khan thla tina lakluh chu Cheng nuai 27.28 a ni a, 2022-23-ah chuan sum lakluh hi pung ve hretin thla tina Cheng nuai 43.66 lalut ang a ni a, 2023-2024-ah pung chho ve lehin Cheng nuai 84.58 thla tin lalut ang an ni.