ZALEN, 31st May, 2024: Vawiin khan Dawrpui Multipurpose Centre ah World No Tobacco Day, 2024 hmanna, Indian Society on Tobacco & Health, Mizoram leh National Tobacco Control Programme, NHM te tangkawp in an buatsaih a, Chief Minister Pu Lalduhoma chuan hmanpuiin "Kan huan thlai te chu rah tha tak neihtir tumin, tui leh leitha te, damdawi te kan pe thin. Kan taksa zawk erawh chu thil tha lo, a tichhe thei thil kan barh leh mawlh mawlh thin si" tiin CM chuan a sawi. 

CM chuan "Ram hmasawnna leh mipuite hriselna hi thil inzawm tlat a ni a, mipui nawlpuite hriselna a that tawk loh miau chuan hmasawnna ruhrel nei tha mahila kan hmasawnna kha a khingbai dawn a. Kan huan thlai te chu rah tha tak neihtir tumin, tui leh leitha te, damdawi te kan pe thin. Kan taksa zawk erawh chu thil tha lo, a tichhe thei thil kan barh leh mawlh mawlh thin si. Vawiin atang hi chuan heng thil tha lo kan chin te hi kalsan tum ila, hnam hrisel leh damrei nih tumin i insiam tha ang u," tiin sawmna a siam a ni. 

Thusawiin Chief Minister chuan, "Vawiin thlengin India ram state zinga puitling zuk leh hmuam ti tam ber kan la ni reng. Cancer vei tamna ber state kan ni a, cancer ni lo natna dang pawh kan tuar nasa hle ang. Kan thihpui ta chiah lo a nih pawhin zuk leh hmuam vanga natna kan tawrh te enkawl nana kan sen ral hi a tam tham ngawtin a rinawm." tiin a sawi a.

Chief Minister hi Indian Society on Tobacco & Health ten Patron Member Certificate hlan a ni a. He ni puala Essay inziahsiak an buatsaih lawmman a sem nghal a ni. Lawmman dawngtute chu: pakhatna K. Lalthapuii, Class 6, Zomuansanga Elementary School, Mission Veng; pahnihna Lalruatdiki, class 7, Holy Missions School, Bungkawn leh pathumna Vanlalrinhlua, class 8, Govt. Bungkawn Vengthar M/S te an ni.

Pi Lalrinpuii, Health Minister chu khualzahawm a ni bawk.