Aizawl July 14, 2023 : Y-20 Meet on Nationalism, Patriotism & Development khuhhawnna chu vawiin khan neih a ni a, Sports & Youth Services Department leh Mizo Zirlai Pawl (MZP) tangkawp chuan Vanapa Hall ah college zirlaite ta sawma an buatsaih. He hunah hian Chief Minister Zoramthanga chu khuallian niin Sports & Youth Services Minister Robert Romawia Royte chu khualzahawm a ni.

Chief Minister chuan thupui pawimawh tak hmanga thalaite tan Y-20 meet buatsaih a ni chu lawmawm a ti a. Resource person te thusawi chu tangkai taka an chhawr a beisei thu a sawi. Vawiin intawhkhawm thupui zinga pakhat nationalism - hnam thinlung chu pawimawh a tih thu sawiin, "Hnam thinlung chu hmanlai atang tawhin hnam dangin mahni hnam an chimral loh nan a lo piang a hnam humhimna atanga lo chhuak a ni," a ti. 

Chief Minister chuan nationalism leh patriotism hmanga development a thlen theih dan sawiin, Indopui avanga ram tlachhe vek pahnih Germany leh Japan chu tehkhin thu ah a hmang a. War reparation te pe in, economy leh politics lama chhe vek mah se, hnam rilru nghet tak pu in an intungdung leh a, tunah chuan khawvel ram hausa leh changkang ber te zinga mi an ni leh tak dan a sawi.

Ministry of Youth Affairs & Sports, Govt. of India chuan India ramin G-20 Presidency a chelh chhunga India ram hmun hrang hranga Youth-20 Programmes a hman chhoh mek chu Mizoramah hman a ni dawn a. G-20 Secretariat lamin phalna an pek tawh angin heng programme te hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak in zirtirna hun atan Sports Department leh MZP tangkawpte hian buatsaihin hma an la a ni.

S&YS Director Dr. Lalrozama chuan he hun hi kaihruaiin vawiinah Aizawla Y-20 Meet khuhhawnna chu district tinah la chhunzawm a nih tur thu a sawi a. Thalaite ah hmasawnna a thlen ngei a beisei thu a sawi. 

MZP President Lalnunmawia Pautu chuan, "Thalaite'n kan nihna ah kan chian a, hnam ah chian a hmangaih nachang kan hriat a pawimawh a ni a ti.