June 23, 2022; Youth for Environment Justice Mizoram (YEJM), Lunglei thalai pawl, Serchhip, Hnahthial, Saikhawpui thalai pawl te chuan, NHIDCL kawng laihin environment a tihchhiat nasat lutuk tihtawp a nih theih nan hmala tura ngenna CM Zoramthanga hnenah an thehlut.

NHIDCL in India environment dan leh hrai pakhatmah an zawm lo tih tarlangin,  Environmental Impact Assessment (EIA) an tihna awmchhun, NH-54 (widening) Aizawl to Tuipang ah pawh EIA report leh plan an zawm hmuh tur a awm lo tih CM hnenah ngenna an thlenah chuan an tarlang, "Leilung fate duhdan ngaih pawimawhna chhete mah nei loin, rapthlak takin kan environment an nghaisa/suamsam a. Mipui thinurin kan kuta dan kenkawh hna kan thawh hma ngeia hma i lak a tul a ni," an ti.

NHIDCL te hmalakna heng; NH-06; Seling to Zokhawthar, NH-54; Aizawl to Tuipang, NH-302; Lunglei to Tlabung, NH-102B; Keifang - Manipur te an endik atangin, kan lui kawr leh lui te (seasonal leh perennial river) a chhilh chu 99.9% a ni tih huai taka an sawi ngam thu te an tarlang bawk.

Zirchianna atanga danin, Mizoram chu Himalayan state zawng zawng zingah sik leh sa inthlak danglam avanga state dinhmun derthawng zinga pahnihna a nih thu te, zir chianna ah chuan, 'Mizoram chuan thihpui tham hliampui a tuar mek a, chhe rup thei a ni,' tia tarlan a nih thu leh chu chu Indian Institute of Science leh Indian Institute of Technology te zirchianna a nih thu te CM hnen a ngenna an thlenah chuan an tarlang.

CM hnen a ngenna an thlen ah hian, thalai pawl hrang hrang aiawh te leh YEJM spokesperson Lalrinfela ten hming an ziak a ni.

YEJM in CM a ngenna an thlen tlangpuite:-

• Mizoram hmun tina chhungkaw tam tak, lui nungchate mana ei zawngte ei zawnna chhut chahsak an ni.
• Chhuangkuain hun rei tak, thi leh thau pawlha an sual chhuah, sangha dil, Nul leh buh chinna leilet tam tak tihchhiatsak an ni.
• Mizoram hmun tina mipuite hi tui thianghlim in tur tlachham thei dinhmunah kan ding.
• India State of Forest Report (FSI, 2021)-in a tarlan danin, Mizoram chuan kum khat chhungin ramngaw 185.51 sq. km. lai kan hloh.
• Environment a chhiat chuan Mizoram leh hnam hi a ral ang. Mizoram hi tlang ram mawi tak ni mahsela, a leilung leh Ecosystem der dep em em a ni.