ZALEN Feb 4, 2025; Kawlkulh Group YMA chuan thuchhuah siamin, dan phal loh, kuhva rah phur te avanga kawngpui a chhiat lohna turin, an huam chhungah kuhva rah phur motor tlan phal a ni tawh lo tih an tarlang.

Thuchhuah an siam a tarlan a nih danin, kawlkulh Group YMA Executive Committee, February ni 1, 2025 (inrinni) a neih chuan kuhva rah phurtu ten Kawlkulh leh a chhehvel kawng an hman dan ngun takin a ngaihtuah a.

Kawlkulh Group YMA huamchhung kawngpui ah tunlai hian kuhva rah phur motor lian leh te tam tham tak an tlan thin tih hriat a ni a, Kawlkulh - Hliappui inkar, tuna Balaji Pvt Limited ten PMGSY - III hnuaia an thawh mek hi tun dinhmunah kawng laih hna zawh fel thawhkhat a ni tawh a, hun reilote-ah kawng chhuat phah a ni tawh dawn nia hriat a nih vang leh Kawlkulh - Puilo kawng, SASCI hnuaia siam zawh thar te, Kawlkulh - Dulte inkar bypass avanga One Time improvement tih hmabak mek te chu tun ang zela kuhva rah phur motor ten an zawh chuan reilote-ah a chhe leh vat dawn nia a lan avangin, ngenna thuchhuah atanga thu leh awm hma chu kuhva rah phur motor te Kawlkulh Group YMA huam chhungah tlan phal a ni tawh lo a, ngenna thuchhuah pawisa lo a tlan lui an awm a nih chuan district thuneitute nena inbiakremna angin hmalak a ni ang.