Aizawl January 13, 2023: Vawiina Sesawng Branch YMA Golden Jubilee khuallian nia a hmanpui naah AH&Vety Minister Er.Lalrinawma chuan YMA member tan hnam dang nupui pasal neih chungchangah kan nihna angin kan thlan thiam a pawimawh a ti a, fa neih tam pawimawh a tih thu a sawi bawk. 

Khuallian Er.Lalrinawma chuan YMA Golden Jubilee lawm thei Sesawng YMA Branch dintute leh hruaitu ni tawh leh ni mek te chu fakawm a tih thu sawiin Jubilee chibai a buk a. YMA pawl tangkai tak, tanpui ngaite tanpuitu leh kan khawtlanga chhiatni leh lawmni ah belh ber leh Mizo nunze mawi leh hnam ziarang chawi nungtu, a awm chu lawmawm a tih thu a sawi. YMA member-te chu mahni hnam nunphung leh ziarang te zahpuilo-a chawinung zel tura sawmin, "Hnam dang nupui pasal neih chungchang-ah YMA members kan nihna angin kan thlan thiam a pawimawh a, Ram leh hnam humhalh kawngah theih tawp chhuah zel ila, hemi rual hian fa neih tam chungchang pawh kan inzirtir thar leh a tul hle a ni," a ti. 

Er. Rinawma chuan YMA Members te chu ruihtheih thil lakah fihlim tur leh mahni awmhmuh theuh ah ruihtheih thil do zel a tul thu a sawi a, "Nun uluk loh hian kan hmalam hun nun thui tak a ti chhe thei, kan ram leh hnam in leirem a rah theih nan ram tana nunna chanta te hrereng in ram leh hnam himna leh enkawlna ah mitin mawh kan phur theuh a ni," a ti bawk. 

Khuallian hian Golden Jubilee lungphun hawnna leh YMA Golden Jubilee Building hawnna anei nghal bawk a ni.

Zawlbuk Group YMA President K.Vanzama pawhin Jubilee thuchah leh members te fuihna thu a sawi a,  hemi puala Souvenir siam chu Ramherliana, Sesawng Branch YMA hruaitu hlui in a tlangzarh a ni.