Aizawl: Central YMA Kumpuan duty, SRS leh Mizoram Police tanghote chuan Ningani zan khan Khamrangah motor ruk ching hnam dang paruk chu an man a, an thurualpui Mizo pakhat chu Zirtawpni zan khan an man zui leh.
Central YMA hian Bethlehem Vengthlang YMA ten drug addict an man Lahmingmawia inpuanna atanga an thu dawnte bawhzuiin April 17, 2019 khan Aizawl chhuah lam veng pakhata motor ruk tumte chu an châng a, an mi chânte hi Aizawl-ah an awm ngei tih pawh an hre thei. Mahse, hemi tum hian an hlawhchham a, heng motor ruk tumte hian Aizawl pawh an chhuahsan zui tih pawh an hre zui a, an chanchin an hriat meuh chuan Khamrang lam hi an lo zuk thleng thla hman a, Kawnpui Police leh YMA te nen tang hovin an man zui ta tho a ni.
Tuna an hriat theih chinah heng hnam dangho hian motor panga chu an ru tawh tih an puang a; mahse, CYMA lam chuan sawm chuang fe chu an ruk ngei tawh an ring thung. “An motor ruk hi Manipur lamahte an hralh thin niin an sawi a; mahse, an hralhna tak hi chiang takin an sawi duh lo,” tiin CYMA Vice President leh Kumpuan Chairman ni bawk R. Lalngheta chuan a sawi.
Heng motor an rukte lo hralhsaktu pawh heng vaiho hnen atang hian an hre nghal a, Zoremmawia, Zuangtui (Muthi road), Horticulture department-a driver hna chelh lai chu Zirtawpni zan khan an man zui ve leh nghal bawk. Zoremmawia hian kum 2017 atang khan motor ruk hi a zuar chhawng tan niin CYMA hruaitute hmaah hian a inpuang a, a motor hralhnate a hriat zui lem loh thu a sawi bawk.
Tuna an mi mante hi motor khalh thiam tak vek an nih thu CYMA hruaitu lam hian an sawi a, an motor ruk tur hi chhun lamah an thlithlai vek thin a, anni lo pawh hi group khat dang, hetianga motor ruk ching hi an awm niin an sawi bawk. Heng motor ruk chingho hian a bik taka siam chabi an nei a, he chabi hian motor chi hrang hrang a mil deuh vek a, he chabi thlalak hi thehdarh an duh lo.
Kumpuan duty-te hian motor panga chu an hmu let tawh a, an hmuh let lehte hi Tata 207-2, Tata 407 SK - 1, Tata 407 LPK - 1 leh Bajaj Pulsar -1 te an ni. Central YMA Vice President chuan, “Kan ram mi ngeiten hnam dang thawhpuia suahsual rawng lo bawl duh an awm hi a pawi tak zet a ni,” a ti a, hetianga motor an hmuh let takah hian hmun hrang hranga atangin motor bo chungchangah phone an dawn hnem tawh thu a sawi bawk.
Motor ruk ching hnam dang an mante hi- Sakin Uddin Borming s/o Rafik Uddin Silchar ; Nurallah Majumder s/o Fazul Majumder, Silchar ; Shamir Uddin Ahmed s/o Samir Ali, Karimganj; Abdul Aman s/o Kamir Ali, Silchar; Hussein Ahmed Lasker s/o Zabet Ali, Silchar; Begu Sharma s/o Bimal Sharma te an ni. (Heng hmingte hi an insawi dan a ni a, an hming hi a tak tak a ni chiah em tih hriat chianna a la awm lo.)