Mizoram Badminton Association, Media and Publicity thuchhuah tarlan danin July ni 15-21, 2022 chhung hian Goa hmunah Yonex Sunrise All India Junior Ranking Badminton Tournament 2022 khelh mek a ni a, he tournament-ah hian H. Lalthazuala, Chanmari West chuan Under -19 Boy's Singles huangah qualifying atanga bul tanin, mi pali (4) a hneh hnuah main draw khel thei turin a in vaw tling.

Saitluangpuia, Ramhlun Venglai pawhin he tournament hi main draw a tling sa in a hmachhawn thei dawn a. Mizo zingah National Ranking Tournament-a main draw a tling nghal thei awmchhun ni a hriat a ni. Main draw-a a tlin nghal theih chhan hi tun thla tir a National Junior Ranking Tournament, Panchkula a neih ah ropui taka main draw in vaw kai a, ranking nei pha hial a a khelh vang a ni. Tun dinhmun ah Saitluangpuia hi U-19 category bik ah India ranking 19-na a ni mek. 

He tournament, Goa a neih mek ah hian Mizo naupang 8 laiin in elna an hmachhawn a, Pullela Gopichand Badminton Academy a coach ni mek leh anmahni enkawltu, Lalhlimpuia (Puipuia) chuan Mizo naupang te'n hma an sawn thu sawiin, beiseina sang tak an neih tan thu a sawi a, "Heng laia player tha te nen pawh an inkhel tawk tan viau tawh a ni" a ti.