ZALEN, Oct. 19, 2024: LPS Vision Production buatsaih, LBS Suzuki Youth Icon 2024 chu Inrinni zan hian a hmawr bawk a ni dawn a, Youth Icon hriat a ni dawn ta a; kumin Top 5 leh icon lo ni tawhte an zai dawn.

LBS Suzuki Youth Icon 2024 Top 3 - Lalbiakkima Hnamte, Lalsangliana leh Peter Lalnunpuia ten Ningani zan khan intihsiak an hmachhawn a, an zing atang hian Youth Icon tur thlan chhuah a ni dawn a, mipuiin an nghahhlelh result chu puan a ni dawn ta.

Result puan hmain show a awm hmasa dawn a, Top 3-te an zai ang a, Top 5-a inhlang kai - Ramengmawia, J. Lalrosanga leh Samson Lalhunruata te an zai ang a. Anni bakah hian Youth Icon atana lo thlan tawh leh icon-a tel boruak nei liante an zai dawn bawk a. Lalrempuia, Zothanpuii, K. Lalthlamuankimi leh Vanlalhmangaiha te an zai dawn a ni.

Youth Icon 2024 hian mipui hlut a hlawh hle a, TV lama thlirtu an thahnem thin bakah intihsiak neihna hmun, LPS Arena-ah chhimtu a tam thei hle.

Top 10 intihsiak tan atangin a hmuna chhimtu a tam nghal a, mi sang chuan an pung khawm ziah a, hemi avang hian Grand Finale chhim duh tan kal hma a fuh ang.