Aizawl June 8, 2023 : Information & Public Relations Minister Lalruatkima chuan Information Technology kaltlangin, Mizo te hi hnam rinawm, hnam tlawmngai, hnam huaisen kanni tih hi midang te hriattah pholang tam ila, chhiatna lai leh fellohna lam ringawt sawi hian thangthar rilru thianghlim te ngaihtuahna hruai sual thei a ni tih hriat a tul a ti. 

Vawiin khan I&PR Dept. leh Information Technology Dept tangkawp te buatsaih Media Workshop for Youtuber & Related Media I&PR Auditorium hawnna hun neih a ni a, hun hmanpuitu Information Minister chuan, "Tunlai media tamtak ah thu belhchian dawl lo a mite rilru tibuai thei thil han pho chhuah mai ching an tam ta a. Kan thalai rilru thianghlim tak tak te hruai kawi thei thil pawh a tam ta hle a ni. Mi thuchhuah chu kan va dang ngawt theilo a chuvang chuan keini lam talin thu belh chian dawl chauh kan tih chhuah hram hram a ngai a, mi rilru buaina thawi dam thei tu kan nih a ngai a ni," a ti. 

Lalruatkima chuan, "Social media hi a chak tawh em em a, chhiar senloh leh hriat senloh in a tam tawh a, heng karah hian thu belh chian dawl lo pawh tam tak a awm a, chuvang chuan thu dik zawk hmuthiam turin kan in zirtir a ngai a ni. Social media a kan hmuh hi a tak a ni kher thin lo a, mi thil post nazawng pawh hi thlir dan lo thiam a ngai thin ni," a ti.

IPR Minister chuan, "Media lama inzirtirna hun hi tha ka tiin kan mamawh tlang hle in ka hria a, hun lo la awm zel turah pawh tih fo atan pawh a duhawm hle a ni. Kan YouTuber leh media danga mi thiam tak tak te pawh hma lo sawn zela midangte tana malsawmna lo ni zel turin ka chah che u a ni," a ti bawk.