Mihringin a hmuhchhuah zingah ‘plastic’ hi a tihfuh ber pawl ni mahse ‘pawi’ khawih hnem ber a ni bawk tia sawi thin a ni a. Polythene leh a kaihnawih phei chuan hmun kilkhawr ber pawh a dapchhuak tawh a, pawi a khawih chhunzawm mek a ni. Aizawl Municipal Corporation chuan tun thla atangin polythene leh a kaihhnawih 50 microns aia pan te chu khawpui chhunga hman a khap tan ta a, nitin nunphung buai phah tam tak an awm vang nge ni hmun tam takah zawm a hlawh lo hle!

Mi tin rilrua awm nia lang ta ber chu ‘a thlakna a awm tak tak hmain an khap ringawt a’ tih hi a ni mek a ni. Dawrkaiho lahin ‘a thlakna tura siam tawih thei bag-te chu a man a to kan ti,’ an ti mek bawk a ni. Nunphungah plastic bag chu a beh ngheh tawh em avangin hetiang ngaih dan a awm pawh hi dem em em tur a ni hran lo e!

‘Polythene bag hi a tlawm bawk sia, chawhmeh leh bungraw lei tu pawh hian a thlawnna pek hi ngaiah an neih hman tawh a, tawih thei bag lah hi duhkhawp hmuh tur a awm loh bakah a man hi a to fe bawk si nen min dawrtute lakah a inthlahrunawm lek lek thin,’ tiin Khatla Venga Departmental store pakhat chuan Zalen a hrilh.

“Eichawp dawr kan ni a, kan hlep a chhe si a, vai rama an tih ang hian kan customer te hnen ah tawih thei bag kan pe thei tih leh an thil lei manah belh theih a ni tih a rei hnuah chuan kan hrilh mai dawn emaw ni? tih te kan ngaihtuah a, tunah chuan polythene kan la hmang hrih,” tiin Zarkawta dawr pakhat neitu chuan a sawi. Civil hospital bawra damdawi dawr tam tak chuan an mahni dawrtute chu an damdawi lei fun nan polythene bag-te an la hmang bawk a ni. Hmar lama hardware dawr pakhat chuan an bungrua chu a sakhat deuh a, a rih thin avangin polythene thlakna vang an tih thu an sawi a, an theih ang angin customer te chu in lam atangin bag keng turin an hrilh thin tih an sawi bawk a ni.

2016 atanga tawih thei bag siamtu, Vanramchhuangi chuan Burma polythene-ah te chuan cheng 15 manah bag 100-te a awm thu sawiin an siam chhuah tawih thei bag chu kilogram khatah cheng 300 leh 250 man a siam chhuah niin a sawi a. Demand erawh anmahni chauh chuan an hneh dawn loh thu a sawi bawk a. “A man chung changah chuan raw material chah thlenna a tlawm lo a, labour cost a lo sang bawk si a, GST kan han chawi leh ngheng bawk a, kan hlep hi chu nuihzathlak khawpa tlem a ni thung,” tiin Zalen a hrilh.