Aizawl November 23, 2022: Mizoram Pradesh Youth Congress Committee chuan, "MNF Vice President zahawm tak Lalthlengliana, Ex MLA-in Hnam Run inkhawma thu a sawinaah, Congress kum 10 rorel chhung khan Corruption kaihhnawih avangin Minister 2 leh MYC Chairman an bang tih a sawi a. Thudik sawi tluantling zo duh si lova, politics-a khingpuite inpuh hmingchhiat tumnaah kan pawm nghet tlat a ni," an ti a, puhhmingchhiat an nih naa zalen taka chhui an nih theihna atana bang an nih zawk thu an sawi a, MNF Minister/MLA ten an ngam ve em tih an zawt bawk.

Congress Thalai chuan, "Khatih laia banna an thehluh nachhan kha puh hmingchhiat an nihnaah a chhuitu tura ruat ten zalen taka an chhui theih na tura banna thehlut zawk an ni tih hi mipuite hriatah kan puang nawn leh a, MNF Minister te hian an ngam ve dawn em? tih hi MNF Vice President hi kan zawt nghal bawk a ni. Congress sawrkara Health Minister Pu Lal Thanzara phei kha chuan Minister a nihna bakah MLA a nihna thlengin banna a thehlut a. Khatih laia opposition party tena an puh hmingchhiatna chu zalen taka chhui a nih theih nan hma a la ngam a. Bye election hial neiin mipui court-ah thiam a chang a ni," an ti.

MPYCC chuan, "Banna thehluttu dang Minister of State Pu Lalrinmawia Ralte pawhin chhui a nih theih nan puh hmingchhiat a nih hnu lawkah Minister atangin banna a thehlut nghal bawk a. Chutiang bawkin Pu T. Sangkunga, Chairman, Mizoram Youth Commission (MYC) pawhin huaisen takin banna an thehlut ngam a. Seal lem hmanga puh hmingchhiat Pu RL Pianmawia, Tuivawl bialtu MLA pawhin rorelna hmachhawn ngamin Jail hial lut mah se, Tuivawl bial mipuiten pangpar thi nen an lo hmuak leh zawk a. Kum 2010 May ni 11 khan, khatih laia High & Technical Education Minister Pu Lalsawta chuan State Technical Entrance Examination chungchangah buaina a awm avangin amah mimalin engmah khawih lo mah se, a changtu Minister a nih angin Chief Minister hnenah banna a thehlut a. Kum 2012 May ni 3 khan, khatih laia Transport Minister Pu PC Zoram Sangliana (L) chuan Transport Bus a accident avangin Chief Minister hnenah banna a lo thehluh tawh bawk a ni. Hetiang hi Congress party  hruaituten puh hmingchhiat an nih chungchanga hma an lak ngam dan leh an chanpualah harsatna a lo thlena mawhphurhna an lak thin dan (moral responsibility) a nih lai hian, vawiina rorel mek MNF Minister te erawh hi chuan anmahni hna chanpuala mualphona awmah pawh ban an ngam lo niin kan ngai nghet tlat a ni," an ti bawk. 

Congress Thalai chuan, Mizoram sum dinhmun chhia te, Airport saklai chimah Lok Ayukta-ah complaint thehluh tawh avang te, Tender tel lova hna lian tam tak inpek chungchangah te, Aviation sum chheprelh chungchangah phei chuan Lok Ayukta -in CBI chhui tur hialin thutlukna a siam tawh tiin, "MNF sawrkar Pu Zoramthanga kaihhruaina hnuaiah hian mipuiten tah leh hathialna hun kan hmang rei ta a. Corruption ni ngeia ngaihtheih thil tam tak inphumah te hian Chief Minister, Finance Minister & PWD Minister ni bawk tan chuan banna thehluh ngei ngeina tur niin kan hria a ni," an ti.

Congress Thalai thuchhuak chuan, "Hripui avanga ram mipuiten thihna hial kan tawh lai leh Healthcare sum tam tak pek theih loh avang mipui an rum mek lai hian Health Minister hian banna  thehluh a tum thawm a awm lova. NABARD sum hmanga School sakah sum bo thlau awm thu Assembly Session hiala sawichhuah a nih hnu pawh hian chhuichian a nih theih nan Education Minister hian banna a thehlut ngam dawn em?," tiin zawhna an zawt.

"Sky walk/Cable Rope Way chungchangah Tourism Minister hlui Pu John Rotluangliana chuan CBI koh luh a cho a. Tuna Tourism Minister nilai hian free and fair investigation a awm theih nan leh, a mawhphurtu diktak rang taka chhui anih theih nan a banna a thehlut ngam dawn em? Rural Development Minister hi "Mister 25%-a" tia miin an sawi thinte hi chhuichian a ngam chuan banna thehlut ve sela. Grapewine zuarttu Nu khawngaihthlak takin nunna a chan hlimte khan Excise Minister khan banna thehluhna thamah a ruat lo em ni? tih hi Congress Thalaite chuan MNF Minister te hi kan zawhna a ni reng ang," an ti bawk.

Hetihlai hian Congress Party chu Remna leh Muanna a awm theihna tura Lalthutthleng hial pawh kalsan ngam party kan ni a. Chuvangin, Congress party-in Pathian leh mipuite zara sawrkarna a chan leh hunah nasa zawkin eirukna a do zel dawn tih Congress Thalaite chuan kan puang a ni, an ti bawk.