Aizawl : India zalenna sualtu Darthawma Renthlei (L), TAMRA PATRA Recipient, Chanmari Lunglei hnenah India ram zalenna kum 75 na ( Azadi Ka Amrit Mahotsav) lawmna kal zelah Deputy Commissioner Office, Lunglei chuan Darthawma Renthlei (L) hriatreng nan  Kulothungan A, Deputy Commissioner, Lunglei hovin a chhungte hnenah vawiin, May 4, 2022 khan chawimawina Certificate an hlan.

Darthawma Renthlei (L) Chawimawina hunah Kulothungan A chuan India zalenna kum 75 lawmna kal zelah India sorkarin zalenna sualtu 75 thlanchhuah zingah Darthawma Renthlei (L) chawimawi tura tel hi a lawmpuiin a chhuang hle a ni a ti a. Darthawma Renthlei (L) chu India in zalenna a sualna kawngah nasa takin tha leh zung a seng a, Indian National Army ah telin India in zalenna a sualchhuahna ah a thawh hlawk hle, a inpekna leh huaisenna te kha thangthar lo awmzel tur ten kan entawn zel dawn a ti bawk.

Darthawma Renthei (L) hi kum 1920 khan Pukpui khuaah a piang a. November ni 27, 1940 ah British Army a zawm a. Kum 1941 khan Malaysia a thawn zingah telin kum 1942 khan Japan leh British sipaite chu Prisoner of War ah man niin Darthawma Renthelei (L) pawh hi a tel a, kum 1946 ah chhuah zalen a ni. Jail atanga a chhuah hnuin Indian National Army a zawm a, India ramin zalenna a hmuh hnuah Freedom Fighter of India ah pawm a ni a. India zalenna sualtute tana siam Tamrapatra Award chu August ni 15, 1973 khan hlan a ni bawk. Darthawma Renthlei (L) hi Lunglei Chanmari ah a nupui fanau te nen chengin July ni 21, 2019 khan a boral a ni.