July 7, 2022; Tukin dar 2:30 khan Zamuang zero point ah motor 2, MZ 01-V-5972 leh MZ 01-V-5750 te atangin, Myanmar kuhva bag 300, Chuauliansawti w/o Lalnuntluanga Colney, Kanhmun ta nia hriat chu man a ni a, mipui pungkhawm ten chung kuhva te chu an hal a, police te nen pawh an innawr buai viau nia thudawn a ni. Kar kalta, June ni 28 zanlai pelh hnu deuh khan Zamuangah vek hian kuhva bag 285 manin, hal a lo ni tawh bawk.

Joint resolution siamin, Hachhek Bial Kuhva Chingtu Pawl (HBKCP), Taitesena Group YMA, Langkaih Group YMA leh Hachhek Joint VC te chuan, foreign kuhva dan lova Hachhek constituency a lolut chu an duh lo tih tarlangin, vawi tam tak Mizoram sawrkar hnenah an thlen hnu pawhin, tukin zing dar 2:30 khan Zamuang zero point ah MZ 01-V-5972 leh MZ 01-V-5750 te atangin foreign kuhva bag 150 ve ve, Chuauliansawti W/o Lalnuntluanga Colney, Kanhmun ta ni a hriat chu, Vairengte Godown atanga Kanhmun godown a dah tur an man tih an tarlang.

"Hetianga dan lova foreign kuhva Mizorama lo lut thin hi kan duh loin kan do tak zet a, foreign kuhva hian Hachhek bial hi rawn lut tawh lo se kan duh a ni," tiin Joint resolution an siamah chuan an tarlang a, "Tun hnuah foreign kuhva phur hian Hachhek constituency an lolut leh a nih chuan eng harsatna pawh tawk se, an cho chhuahah keini All NGOs leh Hachhek joint VC te chuan kan ngai ang," an ti bawk.

ZALEN thudawn danin, Zawlnuam police te chu kuhva manna hmunah hian an kal a. Hachhek bial khaw hrang hrang atanga pungkhawm mipui ten motor atangin kuhva an hlan thlak hnuah an hal a, motor erawh khawih a ni lo. Mipui pungkhawm an tam avangin police tan pawh tih vak ngaihna a awm lo nia thudawn a ni.

He thu ziahlai thleng hi chuan police ah FIR thehluh a la awm lo a, Joint NGO lam chuan kuhva neitu lamin FIR an thehlut a nih chuan counter FIR thehluh ve an tum nia hriat a ni.