Zanin dar 6:30 hian Wimbledon mipa single final khelh a ni dawn a, Winbledon final tum sarih lut tawh Novak Djokovic-a hmaah Grand Slam final vawi khat luhna Nick Kyrgios a ding ang.

Djokovic hian final lut turin  semi-final ah Cameron Norrie chu 2-6, 6-3, 6-2, 6-4 in a hneha, semi final pakhat zawkah Kyrgios leh Nadal te inhmachhawn tur an nih laiin quarter final-a inhliam Nadal chu inhnukdawkin  Kyrgios chuan khel hah lovin final a khelh thei phah dawn ta a ni.

Nizan khan Women’s Singles final Elena Rybakina leh Ons Jabeur ten khelin Rybakina a champion.

Nick Kyrgios-a hian tun hmalamin tournament lian lian a la khel ngai lo va, semi-final-a a hmachhawn tur Rafael Nadal a in withdraw vangin khelh hah ngai lovin final hi a khel dawn a ni. Novak Djokovic-a thung erawhin a Grand Slam title 21 na tur a beisei mek thung a an dinhmun chu a in anglo khawp mai. 

Hetichung hian Kyrgios hian chak zawk theihna chance a ngah hle a, Djokovic nen tum hnih an inhmachhawn tawhah hnehna a la chang ve ve thei a ni. Mahse, Serb mi Djokovic nen a an intum hnuhnun ber pawh kum 2017 daih tawh kha a ni a, a lo hneh tawh thin vang ringawt a ngaihthat ngawt chu a chi chuang lovang. Kyrgios hian professional  tennis chu 2012 atang khan a luhchilh ve tawh a, trophy ropui chawi a la nei lo. Chutih laiin Djokovic thung hi tennis player ropui ber zinga mi a ni thung a, mahse mak takin an pahnih bikah chuan Kyrgios hian record a nei tha hle a, 100 per cent chak record a nei a ni. Anni pahnih hi 2017 khan tum hnih inhmachhawnin Kyrgios  hian straight set-in a hneh lo hneh tawh ngat a ni. 

An intum hmasak zawk hi Mexico-a Acapulco ah niin quarter final ah a ni a, he match-ah hian  set hnih chauh khelin Kyrgios hian 7-6(9) 7-5 in a la a ni.  Hemi tum hian Kyrgios-a service hi a tha thei hle a, tum 26 zet aces neiin  Djokovic-a erawhin ace tumhnih chauh a nei thung. 

Hemi hnu kar hnih lekah ATP Masters Indian Wells round of 16-ah an inhmachhawn leh a, Kyrgios bawk hian 6-4 7-6(3) in a hneh leh a ni. Djokovic hian a Kyrgios-a service hi a la hlei thei lo va, hei hi Kyrgios-a tan chuan a chakna ralthuam a ni leh ang.

An inhmachhawn tawhna hmun hi hard court ve ve a ni a, tun tumah erawh grass court a nih dawn vangin a danglam deuh maithei. 

Kum 35 mi Djokovic-a hian final tum 7 a khelh tawhah tum 6 trophy a chawi thei a, tin Wimbledon bikah hian match 27 zet chu chak loh nei lovin a kal tluang mek a ni.