Aizawl: Serchhip bul Mat phai Zawlpui-a huan neitute chuan an hlawkpui hle a, nikum 2018 chhung ringawt pawh khan an thlai thar atangin vaibelchhe 4 chuang an lei.
Serchhip-a Horticulture thawktute hnen atanga thudawn danin Zawlpui zauah hian thlai chi hrang hrang eng emaw zat chin a ni a, chung zingah chuan zikhlum, bawkbawn, antam leh maian te chu a lar zualte an niin heng kut hnathawktute thlai tharchhuah atang hian kum tin cheng tam tak leichhuah a ni thin a. Nikum 2018 ah ringawt pawh khan Rs. 40,860,000 an leichhuak tih Zalen an hrilh.
Serchhip Agriculture & Horticulture Cooperative Society chairman Siamliana chuan Mat kam, Zawlpui hmuna huan siam chu chhungkaw 100 chuang an ni tih Zalen a hrilh a. “Kumtluanin thlai chi hrang hrang kan ching a, kan hlawkpuiin chhungkaw engemaw zat chu an thlai thar atanga in sa leh motor lei pawh an awm a ni,” a ti. Siamliana chuan an thlaithar te chu a tam ber Aizawl ah an hralh nia sawiin hralh theih loh vanga chhia leh tawih a awm lem lo nia sawiin tun hnaiah erawh bawkbawn thar a tam tham deuh avangin a hralhna kawngah harsatna tlem an tawk niin a sawi bawk.
Zawlpui hmuna huan neitute thlai chi hi Horticulture department chuan an tum sak a, kawng an siamsak bakah training an pe thin a. TATA NEIDA-in tractor pein JICA-in hma an laksak mek bawk a ni.
&&&&&