December 5, 2022; Zanin dar 6 bawr vel khan Zemabawk North ah kangmei chhuakin, Rev. K. Ropara In (Ebenezer Boarding School) leh a bul a Hmangaihzauva In, Assam type chhawng hnih chu bungraw chuh mumal hman lohin a kang a, vanneihthlak takin mihring thi leh hliam an awm lo nia thudawn a ni.

Zemabawk North (Aizawl) atanga ZALEN thudawn danin, kangmei chhuak hun hi zanin tlai dar 6 bawr vel kha niin, Ebenezer Boarding School (Nursery - High School) atana hman leh a neitu Rev. K. Ronghaka te chenna building chhawng 5 chu a kang chhe vek a, school hostel bungrua tlem a zawng erawh an chuh hman. School building hi concrete niin, a thenlai Assam type a zawm a ni a, a neitute chhungkua in an luah bak ah hostel leh class room atana an hman niin, kangmei chhuah chhan tak hi  chiang taka hriat theih a la ni mai lo a, current kal sual te pawh a nih theih rin a ni.

School building bul a Hmangaihzauva In, Assam type chhawng hnih (Chhungkaw pahnih te luah) pawh bungraw engmah chuh hman lohin a kang ral vek bawk a, anni bakah hian kangmei chhuahna in bul vel a in thenkhat pawh kangmei hian a man kai hman a, vanneihthlak takin a nasat hmain thelh a ni a. Kangmei a nasat avangin a bulhnai a in bang thenkhat chhia erawh a awm nual nia thudawn a ni. 

Kangmei chhuak hi CRP tuichawi kal remchang te leh fire brigade lam ten an thelh a, zanin dar 8 bawr vel khan thelh mih thawkhat a ni a, naktuk lamah khawtlangin bungraw senghawi hnatlang khawtlang huap a nei turin ruahmanna siam a ni.