Amah avangin mipui an pungkhawm tawh a, a ‘talent’ avangin mi a ti phurin, mi a kokhawm tawh thin. niminah pawh amah vangin an inah mipui an pungkhawm leh a. a chhungte bakah a then leh rual tha te, zaithiam atanga musician thlengin an pungkhawm; mahse, tun tuma an punkhawm chhan erawh a dan a dang viau. a thihna chuan Zo rimawi khawvel a barakhaih a, internet lamah pawh an uina thu an tarlan hmuh tur pawh a awm nghe nghe. hei hian zo fate zinga ‘mi bik’ a nih zia a pho lang chiang hle awm e. amaherawh chu, a lei taksa erawh kan thlah a ngai ta si.. Zo rimawi khawvela ‘combination’ nei tha ber tia chhal ngam — LALREMMUANA leh NONO-a te hian Project chungchang an sawi ri leh ek ek chauh tiin, an duhthusam te chu an ti hlawhtling thei dawn ta lo a ang ta hle... An project a-vanga Mizo rimawi khawvel pen khata hmasawn tir a, Zo rimawi khawvel sawih danglamtu ti hiala chhal ngam — Nono-a tia kan hriat lar, a hming pum Benjamin Lalrinawma chu he khawvelah kan thlah liam a ngai ta. A chhungte mai ni lo, a then leh rual tha tak takte pawhin an ui a, Zo rimawi khawvelin a chan a; Remmuana nena an project thar pawh buaipui hman ta loin — nimin zing dar 4:10 khan chatuan ram min pansan ta a ni. Kum 46-a upa a ni. Nono-a hi August ni 20, 2014 atang khan a hriselna lamah harsatna tawk chhoin a khua a rawn sik tan a; mahse, a khawsik chuan ziaawm lam pan hlei thei lovin a thawhah a rawn zual a; chumi hnuah Aizawl Hosptal-ah amah lo enkawl thintu Dr. Mawitea chu panin, a ni chuan ICU lamah chawlh hahdam tir a, enkawl a mamawh nia hriain a lo admit nghal a ni. A natna vel chian tuma investigation an tih hnuah a taksaah harsatna eng emaw hmu chhuakin, anti-biotic-a enkawl zui a ni a. A damdawi hnathawh hun nghah a tul nia hriain, hahdam taka darkar 36 tak ventilator-a awm tir a, hahdam zawka a awm theihna'n an chiu mi (sedate) a. A hriselna pawhin ziaawm lam a pan mai tura an beisei laiin, Inrinni zinga dar 4:10 khan a natna chu tuar zo ta lovin thlah liam a ngai ta a ni. Benjamin Lalrinawma Dengchhuana (IAS Rtd.) leh Vanrami te fa naupang ber dawttu ni turin Shillong-ah a piang a, unau pianpui panga (5) a nei a. An unau zinga a naupang ber, a chhang chiah chu Mizo rimawi khawvela mi hriat hlawh tak leh sulhnu ngah tak mai, Samuel Lalrinsanga a ni. A hmingpum chuan hriat a hlawh tawk lo pawh a ni thei — Maitawka tiin sawi ila kan hre kuarh awm e. A ni pawh hian fam min chan san tawh a nih kha. Nono-a hian a nupui Laltanpuii leh a fa te pathum — Steve Vanlalhruaia, Melissa Vanlalngaihzuali leh Bryan Vanlalrinawma te chu a kalsan a. A nupui nen hian kum 1988 khan Kulikawn Presbyterian Kohhran Biak inah an innei a ni.