Aizawl June 7, 2023 : Vawiin khan Samagra Shiksha, Mission buatsaihin NIPUN Bharat Mission hmalakna hnuaiah naupang kum 3-9 inkar ten awmze neia zir thiamna an neih theihna tura hmalakna pakhat Foundational Literacy & Numeracy (FLN) Rally chu Aizawl khawpui chhung hmun thumah neih a ni. S. Malsawmtluanga (Mama), Lalhruaitluanga Chawngte leh Lalrina Renthlei ten he hun hi an hmanpui.

Zirna kalphung thar New Education Policy (NEP) -2020 hnuaiah Sawrkar Laipuiin zirna kawnga hmasawnna atana naupang kum 3-9 inkarin ziak, chhiar leh chhiarkawp te awmze nei zawka an zir thiam theihna atana hmalakna, Foundational Literacy & Numeracy (FLN) Rally hi buatsaih a ni. FLN tih hlawtlin nan leh hmalak chhoh nan hian NIPUN Bharat Mission hi din a ni. 

He Mission zinga hmalakna pakhat chu FLN Rally buatsaih hi a ni a. FLN Rally hi nu leh pa te, NGOs, khawtlang, zirlai leh zirtirtute leh adt. te hnena Awareness Campaign nei zel tur a ni. June ni 1-15 inkar hian NIPUN Bharat Mission kaltlangin State-in tih tur chi hrang hrang a nei a, FLN hi chung zinga hmalakna pakhat a ni.

Rally-ah hian sikul thlan chhuah ten zirna (education) pawimawh thu leh tangkai na te tarlanna school awmna veng-ah zirlai ten an kal kual pui a, a kharna hun hi Joint YMA field, Vaivakawn ; Bawngkawn PS & MS II leh College Veng field ah te neih niin he Rally-ah hian zirlai 1515 an tel a ni.

Foundational Literacy & Numeracy (FLN) Rally-ah hian Mizo zingah professional footballer hmasak ber S. Malsawmtluanga (Mama), Mizo Academy in Book of the Year atana a lehkhabu ziak tum hnih a thlan tawh Lalhruaitluanga Chawngte bakah India aiawha Basketball khel thin Lalrina Renthlei ten an telpui a. Samagra Siksha State Project Office leh District Project Office atangin official ten an tel pui bawk a ni.