2.6.2024; 31.5.2024 (Zirtawpni) khan SDO (C) Conference Hall, Vairengte ah Serlui bial chhung Zirna in atanga HSLC leh HSSLC Distinction-a pass thar te lawmpuina chu bialtu MLA Lalrinsanga Ralte chuan a nei a. Serlui Bial chhung school a tanga Distinction-a pass thar zawng zawng te hi Laptop a pe vek a ni.

Lalrinsanga Ralte chuan a bial chhung Zirna In atanga HSLC leh HSSLC result chhuaka mi engemawzat in hlawhtlinna changa Distinction-a an pass thei chu lawmawm a tih thu leh a lawmpui thu sawiin tuna lawmpuina leh chawimawina an dawn chu duhtawk mai lova hlawhtling tlaka taima taka zir chhunzawm zel tura fuihin tuna hlawhtlinna chang zo ve lo te pawh a tawrhpui thu sawiin beidawng mai lova taima taka an zirlai te zir chhunzawm zel turin a fuih bawk. MLA chuan Zirlai te chu chhawr tlâk leh mi puitling an nih theihna tura rilru zawng zawng seng tura chahin an hun lokal zel turah chona sang zawk an hmachhawn dawn a ni tih hriaa huaisen taka hmachhawn turin a chah bawk.

Lalrinsanga Ralte Serlui Bialtu MLA hian Term hmasa atangin a bial chhung Zirlai pass thar zawng zawngte lawmpuina a pek vek bakah a bial chhung school atanga Distinction a pass te Laptop a lo pe ziah tawh thin a ni. He hunah hian Lalrinsanga Ralte hian Serlui bial chhung Zirna in atanga Distinction nei School te lawmpuina thilpek a pe bawk a ni.

He hunah hian Lalremruata Chhangte, GS, MNF Gen.Hqrs pawhin thusawina hun neiin he hun hi Z. Lalremliana, President, VESA chuan kaihhruaiin Upa Lalzomuana'n hunserh a hmang a ni.