October 20, 2022; Mizo Students Union (MSU) hruaitute leh Mizoram sawrkar aiawhten inbiakna an neih hnuin, vawiin tlai khan inremna an nei a, Mizoram sawrkar chuan college admission fee atanga zirna in tihchangtlunna tur budget a siam sak dawn.

Vawiin chawhma lam khan MSU OB te leh Mizoram sawrkar aiawhte an inbiak hnuin, vawiin tlai khan college admission fee atanga zirna in tihchangtlunna tur ruahmanna siam turin inremna siam a ni a. Chumi tura tihfel ngai te chu file ah kaltir nghal niin, vawiin tlai dar 5 bawr vel khan CM office a thleng a, hemi ngaichang hian CM office bul, High School field bul ah zirlai thahnemtak an pungkhawm a ni. 

CM office a sawrkar aiawh leh MSU aiawh ten file an luhpui hnuah MSU president Samuel Zoramthanpuia chuan zirlai pungkhawmte hma ah thusawiin, MSU in kum 2013 atanga zirna in in hma a sawn theihna tur atana college admission fee atanga college development tihpun an rawtna chu sawrkarin a pawm ta tih a puang a ni.

"Vawiin a hnatlangte hian Mizoram zirna in tan bung thar kan sualchhuak a ni tih ka sawi duh a, in tu leh fate thlenga chhuan tham in sual chhuak a ni," MSU president chuan a ti.