Zirlaiten Assembly secretariat a punkhawm kaltlangpui dawn
Tualchhung
Jul 06, 2023
ad
ad
July 6, 2023; Assembly Secretariat lam atanga thut sutna a awm loh avangin, naktuk a zirlaiten Assembly Secretariat a punkhawm an tum chu kaltlangpui a ni dawn.
 
ZALEN in zirlai hruaitute hnen atanga thu a dawn danin, he thu buatsaihlai vawiin tlai thlengin Assembly Secretariat lamin an thu sutna an la nei lo a, hemi avang hian an lo tum tawh angin naktuk zing dar 8:30 atangin zirlaite an pungkhawm ang.
 
Zirlai pawl hrang hrang - MZP, MSU, Hnampual Zirlai Pawl, College SU hruaitute thukhawm chuan, Mizoram Assembly Secretariat hnuaia thawktu lak chungchangah chhungkhat laina induhsak bikna awm nia an hriat chungchang leh hemi avanga hna lakna tur Order lo siam tawh sut leh tura an ngenna chungchang an ngaihtuah a. Hemi hnua thuchhuah an siamah he hna lakna tura an ngenna in awmzia a nei lo a nih chuan July 7, 2023 (Zirtawpni) zing dar 8:30-ah Mizoram Assembly House kawt-ah punkhawm an rel tih an tarlang a, Mizo Zirlai zawng zawng leh Mizo thalai hna zawng mek te kal turin an sawm a ni.
 
Hetihlai hian Mizoram Legislative Assembly Secretariat chuan thuchhuah siamin he hna lak chungchang hi a sawifiah a. Nimin-a thuchhuah an siamah Mizoram Legislative Assembly Secretariat a hna hrang hrang- Assistant, Translator, UDC leh LDC lakna hi The Mizoram Legislative Assembly Secretariat (Recruitment and Conditions of Service) Rules, 1995 as amended dan ang thlapa lak a nih thu leh heng hna lakna atan hian Aizawl-a Chanchinbu pahnih ah kumin January 25 leh 26 khan Advertisement tihchhuah a nih thu bakah mi 2369 laiin application an thehlut tih an tarlang a. 
 
Hna hrang hranga Form lachhuak zat leh exam zo (complete) zat tarlangin, Translator-ah Form lachhuak 827 awmin mi 159 in exam an zawhfel thu te, Assistant:-ah Form lachhuak 2540 awmin 453 in exam an zawhfel thu te, UDC-ah Form lachhuak 1610 awmin mi 310 ten exam an zawhfel thu leh LDC-ah mi 3055 ten Form lachhuakin 712 ten exam an zawhfel thu te an tarlang a ni.
 
Mizoram Legislative Assembly Secretariat chu Indian Constitution Article 187 hnuaiah Secretarial Staff hrang nei tura tih a nih thu leh Recruitment Rules leh Service Condition pawh he Article hnuai veka thuneihna nei a nih angin, tha a tih angin a kalpui thin thu an thuchhuah ah chuan an tarlang a. 
 
Tuna hna hrang hrang lak chungchanga pawl thenkhatin hma an la chu thil tha duhna a nih avangin lawmawm an tih thu leh an duh dan anga appointment hi cancel leh a nih chuan dan ang thlapa lak an nih avangin Court-ah kal se Secretariat lam hian an hneh dawn lo reng reng tih tarlangin, “Hei vang hian cancel leh chi-ah kan ngai lo a ni,” an ti a. Exam a marks leh mahni Answer Paper-te pawh a duh tan RTI hmanga dil theih reng a ni tih an tarlang bawk.

Latest News & Chhiar Hlawh