October 20, 2022; Mizo Students Union (MSU) huaihawtin Vanapa Hall kawtah college zirlai thahnemtak, admission leh tuition fee sawrkar a chhunluh duh loh lantirin 'College Hmasawnna Hnatlang' an nei a, he thu ziahlai hian MSU hruaitute leh sawrkar aiawh ten inbiakna an nei mek.

Vanapa Hall kawt a zirlaite punkhawmna ah MSU hruaitute chuan thusawiin, zirlaiten admission fee leh tuition fee Rs. 1,320 an chawi thin chu sawrkarah lut lo a, college tih hmasawnna atan hman an phut tih an sawi. 

MSU hruaitute chuan sawrkar awm tawh zawng zawng ten college zirlai ten admission fee Rs. 120 bakah tuition fee Rs. 1,200 (Rs. 1,350) sawrkar ah an chawi thin a, chu chu MSU chuan tha a ti lo a, kum 2013 leh 2017 ah sawrkarah an lo thlen tawh a, kum 2019 ah Bairabi a MSU general conference ah rorel agenda ah nei lehin, kum 2020 March thla ah an rorel bawhzuiin, chief minister Zoramthanga hnenah an thlen tih an sawi.

Hemi chungchang hi kum 2022 October a MSU general conference ah agenda ah an dah leh thu te, college zirlai hmasawnna tur a MSU in rawtna an thlen te sawrkarin a ngai pawimawh lo nia an hriat avangin vawiin hi an thleng ta niin an sawi bawk.

Zirlaiten admission fee leh tution fee Rs. 1,320 sawrkar a chhunluh an phalloh nachhan tarlang bawkin, "Central enkawl University te chuan anmahni in develop nan te, zirtirtu indaihlo rawih belhna atan te, college building sakna atan te, property leina atan te an hmang a, chung atana hman ve tawh chu kan duh a, zirlaite kan pungkhawm a ni," an ti.

MSU hruaitute tarlan danin, kumin a zirlaiten admission leh tuition fee sawrkar a an chawi zat chu Rs. vbc. 2.72 a tling.

He thu ziahlai hian MSU OB te leh sawrkar aiawhte chuan inbiakna an nei a, an thuchhuak ngaichangin, zirlai thahnemtak te chu Vanapa Hall kawtah an pungkhawm a ni.