Aizawl July 12, 2023 : AAP Mizoram chuan Inthlan hnaih ruala zirna siamthat chungchang party dangte’n an aupui chu lawmawm an ti a, a tak a thlen tir duh tak takna rilru pu turin an ngen tih an sawi.

AAP Mizoram chuan, "Tunhnaiah The Hindu chanchinbu in India ram state-a zirna dinhmun a tarlante zingah Mizoram state chu a hniam berte zinga mi a ni hi a zahthlak kan ti hle a, Education changtute’n Zirna in Mizoram-ah hma a sawn tia an sawi thin dikloh zia nemnghettu a ni," an ti.

AAP Mizoram chuan Sangau a zirlaite’n zirtirtu chungchanga nawrhna an huaihawt chu pawi an ti a, zirlaite zawkin zirtirtu dila sawrkar an kar khan sawrkar in zirlaite zirna a ngaihsak loh zia a ti lang chiang an ti.

AAP chuan Party dangte’n Corruption do an tum thu an sawi vek a, mahse engtinnge an do ang, engtinnge hmalak an tum sawi chianna hmuh tur a awm lo a, intiamna engmah an siam theilo. Corruption chu ram hmasawn theih lohna bul ber leh ram in hma a sawn theih nana do ngei ngei ngai a ni, an ti. Mizo mipuite an tiam chu hmasawnna hnathawhna atang leh thil dangah Minister leh MLA ten eng percent mah la lo ang tih hi a ni, an ti.