Aizawl June 21, 2024 : Cancer-ah pawh zai harsa leh huphurhawm ti sawi thin Thin (Liver) Cancer leh Mit (gallbladder) chu Zoram Medical College-ah zai tan a ni a, a vawikhat nan vawiin khan Thin Cancer zai a ni.

Thin (Liver) leh Mit (gallbladder) Cancer te hi Mizoram-ah zai theih loh deuh thaw-a ngaih a nih avangin phai lamah mi tam tak Refer an ni thin a, hun eng emaw atang khan regular takin Mit cancer hi Zoram Medical College (ZMC)-ah an zai thei tawh a, case eng emaw zat zai tawh an ni.

Zoram Medical College (ZMC) hian khawl changkang leh tha an nei tawh a, a hmang thei doctor-te pawh training ten an kal thin. Tata Memorial Hospital, Mumbai-ah pawh Thin Cancer zai chungchang training in an kal a. Tun tumah hian Mizoram-a la zai ngai loh Thin (Liver) Cancer Zaipui (Major Liver Resection) hi an thei ta a ni. Thin vei lam pumpui paih (Left Hepatectomy) a ni a, Thin vei lam chawmtu thisen zampui (Left portal vein, Left Hepatic Vein, Left Hepatic Artery) te uluk taka lak a ni.

Thin Cancer hlawhtling taka zaitu team te hi Surgeon Dr. Samuel Lalhruaizela, Associate Professor leh Assistant Surgeon Dr. Willie Lalhruaitluanga, Assistant Professor, Department of Surgery-te an ni a, Head of Deapartment-te rawn chungin tha takin an zai a ni. Anni bakah hian Junior Doctor leh Nursing Staff thiam tak takten an pui a, ICU lamah Anaesthesiology team ten damlo te hi tha tak leh uluk takin an enkawl bawk a ni.