Aizawl: Mizoram Institute of Medical Education and Research (MIMER) tih hming pu-a din, Zoram Medical College hmingthlak tak Society a dah a nih chhan chu Central-in medical college a din thin dan zul zui a nih thu leh bungrua lei chuang a awm thu Zalen-in RTI-a a dilchhuahah tarlan a ni a. Hemi bakah hian H&FW hnuaiah budget pangngaia enkawl niin Central lamah pawh puihna dap a nih mek thu chhanna ah hian a lang bawk a ni.

RTI chhanna atanga a lan danin Society Registration (MSR 967 of 14.09.2018 ) hnuaiah ZMC chu society a ziahluh a ni tawh a, RIMS leh NEIGRHIMS te ang bawkin central in medical college a din thin dan zul zui a nih vang niin ziah lan a ni bawk a ni.

Medical bungrua te lei hmuh tawh zat, mamawh zat nen a inmil em? tia zawhna chu bungraw neihsa a awm nual avangin bungrua a chuanga lei a awm ‘nual’ thu leh chungte chu ‘a remchan’ dan anga hman tangkai an nih thu ziahlan a ni bawk.

MIMER atanga ZMC a hmingtlak chuan thatna/hlawkna a nei lem lo em? tih zawhna chu danglamna a awm lo nia an hriat thu in chhan a ni bawk.

Zoram Medical College chuan MCI Norms phak lohna a nei em? tih zawhna erawh phak lohna ‘a awm lo niin a lang’ tia chhangin a phak leh phak loh thu chiang faka ziah a ni lo thung a. MCI in a phal angin 2nd batch MBBS chu class kalpui mek a nih thu ziahlan a ni bawk.

Zoram Medical College chu Principal Director, Health & Family Welfare Department hnuaiah budget pangngai anga kalpui a ni tih sawiin ‘Central fund hmu turin Central fund tel lovin engtin nge kalpui tum a nih?’ tih zawhna chu, “Central fund hmu turin project proposal eng emaw zah siam a ni,” tih chu an chhanna a ni.

He college a thawktu doctor leh zirtirtu a ngheta thawk te hian NPA (non practicing allowance) an la hlawm a, contract a hnathawk lak te chuan an la lo thung a, NPA la chunga hmun danga thawk kawp leh kawp loh chu an hriat loh thu an RTI chhanna ah hian an tarlang bawk a ni.