January 17, 2024; State sawrkarin ZMC an kalpui chhunzawm theih nan a bik taka puihna 'special package' pek an nih tur Mansukh Mandavya, Union Health Minister in a sawi.

Lalrinpuii, Health Minister chuan nimin (17.1.24) khan Mansukh Mandavya, Union Health Minister hmuin inkawmhona hun tha tak an nei.

Health Minister hian ZMC-in hma a sawn zel dan turte thlenin, Central sawrkar chu theihtawpchhuahpui turin a ngen a. Sawrkar tana a hautak lutuk dawn chuan Central sawrkar kuta hlan mai tha ni-a an hriat thu a thlen bawk.

Union Health minister chuan Mizoram sawrkar chu tha taka thawhpuia theihtawpa tanpui a inhuam thu sawiin, state sawrkarin an kalpui chhunzawm theih nan a bik taka puihna 'special package' pek an nih tur thuin a chhang a ni. Health Minister hian Lalduhoma, Chief Minister rawn nghalin, special package chu project te siam a, CM hova bawhzui nghal an tum a ni.